O Zinâ

Ediçion

E notiçie da-a Liguria

Senti a verscion registrâ:

In Liguria 80 euro à chi abbatte un pòrco sarvægo

In Liguria arriva o taggion pe chi abbatte i pòrchi sarvæghi. A novitæ a l’é stabilia con unna delibera da Region ch’a prevedde un contributo d’80 euro pe ògni femina cresciua de pòrco sarvægo ammassâ inte zöne de restriçion pe-a pesta suiña ò drento 50 chilòmetri da-i seu confin. Se passa à 40 euro pe-i mascci, 30 euro pe-e bestie abbattue feua da-e zöne cade ò pe ciascheduña carcassa attrovâ. O finançiamento inte l’insemme o costa pöcassæ 200mia euro, unna parte di 3,3 mioin missi à dispoxiçion da Alisa pe crovî e speise sostegnue pe contrastâ l’epidemia. Conträi i animalisti, che parlan de un «regallo» a-i caccioei.

Traduçion italiaña

In Liguria 80 euro a chi abbatte un cinghiale

In Liguria arriva la taglia per chi abbatte i cinghiali. La novità è stabilita con una delibera della Regione che prevede un contributo di 80 euro per ogni femmina adulta di cinghiale uccisa nelle zone di restrizione per la peste suina o entro 50 chilometri dai suoi confini. Si passa a 40 euro per i maschi, 30 euro per gli esemplari abbattuti fuori dalle zone calde o per ciascuna carcassa rinvenuta. Il finanziamento complessivamente costa circa 200mila euro, parte dei 3,3 milioni messi a disposizione da Alisa per coprire le spese sostenute per contrastare l’epidemia. Contrari gli animalisti, che parlano di un «regalo» ai cacciatori.

Ponte Morandi, a texi de Spea: «Vegnuo zu pe un pacciugo inta construçion»

Saieiva stæto un «pacciugo» inta construçion a caxonâ o deruo do ponte Morandi, a-i 14 d’agosto do 2018. A l’é a texi espòsta da-i esperti de Spea into proçesso. O squascio, segondo i consulenti, o l’é avvegnuo scì pe-a rottua di ligneu di cavi primmäi do pillon 9, ma o livello de consummaçioin o l’ea «anòmalo» a-o confronto co-i atri pilloin, anche pe di erroî «ascoxi» da chi aiva fæto o travaggio ascì. Pe sta raxon, segondo i consulenti e i avvocati di imputæ, serve de «neuve preuve de carrego» pe quantificâ a rescistensa de tutti i elementi da struttua do ponte.

Traduçion italiaña

Ponte Morandi, la tesi di Spea: «Crollato per un pasticcio nella costruzione»

Sarebbe stato un «pasticcio» nella costruzione a provocare il crollo del ponte Morandi, il 14 agosto 2018. È la tesi esposta dagli esperti di Spea durante il processo. Il cedimento, secondo i consulenti, è avvenuto sì per la rottura dei trefoli dei cavi primari della pila 9, ma il livello di corrosione era «anomalo» rispetto agli altri piloni, anche per errori «nascosti» pure da chi aveva eseguito il lavoro. Per questo motivo, secondo i consulenti e gli avvocati degli imputati, servono «nuove prove di carico» per quantificare la resistenza di tutti gli elementi strutturali del ponte.

Reddito de çittadinansa sensa manco parlâ italian, raffega de denonçie

No parlavan manco italian, però piggiavan o reddito de çittadinansa. A Guardia di finansa da Spezza a l’à denonçiou 32 persoñe de naçionalitæ romeña pe avei perçepio o sostëgno sensa aveine o drito, 17 pe sostituçion de persoña e 6 pe reçiclaggio. L’imbròggio o vaiva pöcassæ 300mia euro: dæto che no arriëscivan à fâse capî, se favan accompagnâ a-e pòste da un traduttô e presentavan di papê con de identitæ fäse pe figuâ comme çittæn italien e ottegnî o reddito. Un veo scistema organizzou, graçie anche a-a conlaboraçion con de atre persoñe che mesciavan a-o xeuo i dinæ in sce de atre carte.

Traduçion italiaña

Reddito di cittadinanza senza nemmeno parlare italiano, raffica di denunce

Non parlavano nemmeno italiano, però prendevano il reddito di cittadinanza. La Guardia di finanza della Spezia ha denunciato 32 persone di nazionalità rumena per aver percepito il sostegno senza averne diritto, 17 per sostituzione di persona e 6 per riciclaggio. La truffa valeva circa 300mila euro: dato che non riuscivano a farsi capire, si facevano accompagnare alle poste da un traduttore e presentavano documenti con identità false per figurare come cittadini italiani e ottenere il reddito. Un vero sistema organizzato, grazie anche alla collaborazione con altre persone che spostavano subito il denaro su altre carte

E notiçie da l’Italia

Senti a verscion registrâ:

Strage da çentrale à Suviana, sette mòrti e çinque ferii

Graviscimo açidente in sciô travaggio à Bargi, in sciô lago de Suviana inte l’Appennin bologneise: a-i 9 d’arvî unna turbiña a l’é scciuppâ inta çentrale idroelettrica Enel Green Power con caxonâ un inçendio, l’allagamento de un cian e o deruo de un soâ. Sotta gh’é arrestou 12 tecnichi, pe-o ciù de dite esterne, apreuvo à fâ di travaggi d’aggiornamento energetico. Trei de loiatri ean o baccan e doî louanti de l’Engineering Automation, açienda de Mê (vexin à Zena) ch’a travaggiava pe conto da Siemens. I atri louavan pe l’Enel e de atre açiende incarregæ. O còrpo de l’urtimo desperso o l’é stæto attrovou a-i 12 d’arvî. Çinque persoñe son arrestæ gravemente ferie con de bruxeuie. A Procua de Bològna a l’à averto unn’investigaçion pe desastro e ammassamento corposo. A Cgil e a Uil an proclamou un sciòpero generale de 4 oe pe dî basta a-i mòrti in sciô travaggio e intanto se va verso unna «patente à ponti» pe çertificâ a seguessa de impreise, no solo inte l’ediliçia.

Traduçion italiaña

Strage della centrale a Suviana, sette morti e cinque feriti

Gravissimo incidente sul lavoro a Bargi, sul lago di Suviana nell’Appennino bolognese: il 9 aprile una turbina è esplosa nella centrale idroelettrica Enel Green Power causando un incendio, l’allagamento di un piano e il crollo di un solaio. Al di sotto sono rimasti 12 tecnici, perlopiù di ditte esterne, intenti a effettuare lavori di aggiornamento energetico. Tre di loro erano il titolare e due lavoratori della Engineering Automation, azienda di Mele (vicino a Genova) che operava per conto della Siemens. Gli altri lavoravano per Enel e altre aziende in appalto. Il corpo dell’ultimo disperso è stato ritrovato il 12 aprile. Cinque persone sono rimaste gravemente ferite con ustioni. La Procura di Bologna ha aperto un’inchiesta per disastro e omicidio colposo. Cgil e Uil hanno proclamato uno sciopero generale di 4 ore per dire basta ai morti sul lavoro e intanto si va verso una «patente a punti» per certificare la sicurezza delle imprese, non solo nell’edilizia.

Pulia, o M5s o sciòrte da-a zonta: erta tenscion co-o Pd

No s’appaxenta a scituaçion politica da Pulia: o Movimento 5 Stelle o l’é sciortio da-a zonta regionale do Michele Emiliano dòppo l’investigaçion pe voto de scangio che l’à da fâ ascì con l’assessoa Maurodinoia, ch’a l’à dæto e dimiscioin. À annonçiâlo l’é stæto o Giuseppe Conte: «Semmo chì à leze de pagine de crònaca giudiçiäia da mette poia. No combattemmo solo a Meloni e compagnia, no femmo de sconti manco a chi l’é into nòstro campo», o l’à dito. «Anche i atri partii son pe-a legalitæ», o l’à commentou o prescidente Emiliano, tanto che a segrettäia do Pd Elly Schlein a ciamma «un cangio de fase netto». Ma i atri democratichi replican a-o Conte: «Ch’o no se permette de parlâ coscì do Pd».

Traduçion italiaña

Puglia, il M5s esce dalla giunta: alta tensione col Pd

Non si placa la situazione politica della Puglia: il Movimento 5 Stelle è uscito dalla giunta regionale di Michele Emiliano dopo l’inchiesta per voto di scambio che riguarda anche l’assessora Maurodinoia, che ha rassegnato le dimissioni. Ad annunciarlo è stato Giuseppe Conte: «Stiamo leggendo pagine di cronaca giudiziaria che fanno tremare i polsi. Non combattiamo solo Meloni e soci, non facciamo sconti nemmeno a chi è nel nostro campo», ha detto. «Anche gli altri partiti sono per la legalità», ha commentato il presidente Emiliano, mentre la segretaria del Pd Elly Schlein chiede «un cambio di fase netto». Ma gli altri democratici replicano a Conte: «Non si permetta di parlare così del Pd»

O Amadeus verso l’addio a-a Rai, l’açienda: «Niscuña prescion»

O Amadeus, conduttô televixivo ch’o l’à presentou e urtime çinque ediçioin do Festival de Sanremmo, o l’é in scî pissi de lasciâ a Rai. E indiscreçioin parlan de prescioin reçevue da l’açienda che l’avieivan portou a-a deçixon da passâ à Nove, a ræ ch’a l’aiva za ingaggiou un campion de share comme o Fabio Fazio. Ma pe-a Rai ste chì son de intepretaçioin «fäse e dannose», perché o Amadeus o l’avieiva avuo delongo «a mascima autonomia e libertæ» inte tutte e deçixoin. De atre voxe dixan che o Fiorello ascì o saieiva pronto à anâghe apreuvo, ma lê o commenta: «Nisciun m’à offerto ninte».

Traduçion italiaña

Amadeus verso l’addio alla Rai, l’azienda: «Nessuna pressione»

Amadeus, conduttore televisivo che ha presentato le ultime cinque edizioni del Festival di Sanremo, è sul punto di lasciare la Rai. Le indiscrezioni parlano di pressioni ricevute dall’azienda che lo avrebbero portato alla decisione di passare a Nove, il canale che aveva già ingaggiato un campione di share come Fabio Fazio. Ma per la Rai queste sono interpretazioni «false e dannose», perché Amadeus avrebbe sempre avuto «la massima autonomia e libertà» in tutte le scelte. Alte voci dicono che anche Fiorello sarebbe pronto a seguirlo, ma lui commenta: «Nessuno mi ha offerto niente».

E notiçie da-o mondo

Senti a verscion registrâ:

Stato Islamico, allarme attentati pe Stati Unii e Champions League

Dòppo l’attentato à Mosca cresce l’allarme pe di poscibili neuvi attacchi de terroriximo. O cappo de l’Fbi Christopher Wray o l’à misso in guardia da sto reisego parlando a-o Congresso american. Intanto o Stato Islamico, pe mezo da seu fondaçion Al Azaim, o l’à ammenassou de corpî inti staddi donde se zeuga e partie de Champions League. Torna o peson de un desastro nucleare in Ucraina con l’attacco di droin rusci in sciâ çentrale de Zaporižžja. O prescidente Volodymyr Zelensky o l’avverte i Stati Unii: «Se no n’aggiuttæ perdemmo a guæra». O Donald Trump, candidou repubrican a-e eleçioin che vëgnan, o l’avieiva un cian segretto: fâ prescion in sce Kiev perché a dagghe via a-a Ruscia a Crimea e o Donbass.

Traduçion italiaña

Isis, allarme attentati per Stati Uniti e Champions League

Dopo l’attentato a Mosca cresce l’allarme per possibili nuovi attacchi terroristici. Il capo dell’Fbi Christopher Wray ha messo in guardia da questo rischio parlando al Congresso americano. Intanto l’Isis, tramite la sua fondazione Al Azaim, ha minacciato di colpire negli stadi in cui si giocano le partite di Champions League. Intanto torna l’incubo di un disastro nucleare in Ucraina con l’attacco dei droni russi sulla centrale di Zaporižžja. Il presidente Volodymyr Zelensky avverte gli Stati Uniti: «Se non ci aiutate perdiamo la guerra». Donald Trump, candidato repubblicano alle prossime elezioni, avrebbe un piano segreto: fare pressione su Kiev perché ceda alla Russia la Crimea e il Donbass.

Çentomia in ciassa contra o Netanyahu, euggi pontæ in sce l’Iran

No s’afferma e proteste in Isræle pe domandâ a liberaçion di ostaggi e ciammâ e dimiscioin do prescidente Benyamin Netanyahu: solo à Tel Aviv 100mia persoñe son anæte in ciassa, scontri tra poliçia e manifestanti. L’Iran o menassa ancon unna respòsta à l’attacco contra a seu ambasciâ à Damasco, i Stati Unii mandian di rinfòrsi. L’exerçito intanto o l’à annonçiou o retio de tutte e truppe de tæra da-o Sud da Striscia de Gazza. «No ghe saià nisciun fermæ o feugo sensa che torne i ostaggi», o l’à dito o Netanyahu ch’o l’à promisso: «A vittöia a l’é vexiña». Trei figgi do cappo de Hamas Ismail Haniyeh son stæti ammassæ inte un attacco isrælian à Gazza, definii «martiri».

Traduçion italiaña

Centomila in piazza contro Netanyahu, occhi puntati sull’Iran

Non si fermano le proteste in Israele per chiedere la liberazione degli ostaggi e invocare le dimissioni del presidente Benyamin Netanyahu: solo a Tel Aviv 100mila persone sono scese in piazza, scontri tra polizia e manifestanti. L’Iran minaccia ancora una risposta all’attacco contro la sua ambasciata a Damasco, gli Stati Uniti invieranno rinforzi. L’esercito intanto ha annunciato il ritiro di tutte le truppe di terra dal Sud della Striscia di Gaza. «Non ci sarà nessun cessate il fuoco senza il ritorno degli ostaggi», ha detto Netanyahu che ha promesso: «La vittoria è vicina». Tre figli del capo di Hamas Ismail Haniyeh sono stati uccisi in un attacco israeliano a Gaza, definiti «martiri».

L’eclisci de sô a l’incanta l’America, ciù de 200 mioin à ammiâla

Dexeñe de mioin de persoñe son stæte co-i euggi a-o çê pe ammiâ l’eclisci piña de sô, vixibile inte tutto o Nòrd America, da-o Mescico fin a-o Canada. Scheue serræ, staddi gremenii, aberghi pin de turisti pe un evento ræo e pin de reciammo. Solo che inti Stati Unii s’é contou un pubrico de 200 mioin, o mæximo che 50 SuperBowl tutti insemme. De seguo a l’é stæta l’eclisci ciù social da stöia, con miliardi de persoñe ch’an posciuo ascistî d’in sciâ Ræ. A pròscima eclisci piña a saià a-i 12 d’agosto do 2026, vixibile da l’Euröpa ascì e in particolâ da-o Nòrd da Spagna verso o tramonto.

Traduçion italiaña

L’eclissi solare incanta l’Ameria, oltre 200 milioni a osservarla

Decine di milioni di persone col naso all’insù per osservare l’eclissi solare totale, visibile in tutto il Nord America, dal Messico fino al Canada. Scuole chiuse, stadi gremiti, alberghi pieni di turisti per un evento raro e affascinante. Solo negli Stati Uniti è stato calcolato un pubblico di 200 milioni, l’equivalente di 50 SuperBowl contemporaneamente. Di certo è stata l’eclissi più social della storia, con miliardi di persone che hanno potuto assistere online. La prossima eclissi totale sarà il 12 agosto 2026, visibile anche dall’Europa e in particolare dal Nord della Spagna verso il tramonto.