O Zinâ

Ediçion

E notiçie da-a Liguria

Senti a verscion registrâ:

Neuva diga de Zena, à mazzo se pösa o primmo cascion

L’é comensou à Voæ a fabricaçion do primmo cascion da neuva diga de Zena che, segondo o programma, o saià pösou in mâ davanti à San Pê d’Æña primma da fin de mazzo. A delibera de l’Anac, ch’a l’à contestou de critiçitæ inta proçedua d’assegnaçion di travaggi a-o consòrçio PerGenova Breakwater, a no ferma o cammin de l’òpia ch’a vâ un miliardo d’euro e passa. O ministro di Traspòrti Matteo Salvini, into responde a-e interrogaçioin a-a Camia, o l’à asseguou: «A se faià inti tempi previsti». O termine o l’arresta quello do contræto, o 2026. Intanto l’Autoritæ portuale a s’appensa d’impugnâ o provedimento de l’Anticorruçion.

Traduçion italiaña

Nuova diga di Genova, a maggio si posa il primo cassone

È iniziata a Vado la fabbricazione del primo cassone della nuova diga di Genova che, secondo il programma, sarà posato in mare davanti a Sampierdarena entro la fine di maggio. La delibera di Anac, che ha contestato criticità nella procedura di assegnazione dei lavori al consorzio PerGenova Breakwater, non ferma il cammino dell’opera che vale oltre un miliardo di euro. Il ministro dei Trasporti Matteo Salvini, rispondendo alle interrogazioni alla Camera, ha assicurato: «Si farà nei tempi previsti». Il termine rimane quello del contratto, il 2026. Intanto l’Autorità portuale valuta di impugnare il provvedimento dell’Anticorruzione.

Euroflora 2025 a torna à cà into neuvo Waterfront de Levante

L’é stæto presentou à Zena l’ediçion numeo 13 de Euroflora, da-i 24 d’arvî a-i 4 de mazzo do 2025. Dòppo l’esperiensa di parchi de Nervi, a manifestaçion a torna inta cornixe stòrica, apreuvo à trasformâse into Waterfront de Levante, dond’a l’é nasciua do 1966. Ghe saià de novitæ: un neuvo parco da 30mia metri quaddri, che segondo o scindico Marco Bucci o l’avià 5mia erboi, di spaçi espoxitivi gallezzanti e di atri drento a-o neuvo Palasport. «Renascion» o saià o temma de l’ediçion ch’a vëgne. O progetto o l’é stæto firmou da l’architetto Matteo Fraschini e o l’avià ascì de referense à l’arte contemporanea.

Traduçion italiaña

Euroflora 2025 torna a casa nel nuovo Waterfront di Levante

È stata presentata a Genova l’edizione numero 13 di Euroflora, dal 24 aprile al 4 maggio 2025. Dopo l’esperienza dei parchi di Nervi, la manifestazione torna nella cornice storica, in via di trasformazione nel Waterfront di Levante, dove è nata nel 1966. Ci saranno alcune novità: un nuovo parco da 30mila metri quadrati, che secondo il sindaco Marco Bucci avrà 5mila alberi, spazi espositivi galleggianti e altri all’interno del nuovo Palasport. «Rinascita» sarà il tema della prossima edizione. Il progetto è stato firmato dall’architetto Matteo Fraschini e avrà anche riferimenti all’arte contemporanea.

Confindustria, a Liguria a perde a partia da prescidensa

No ghe saià nisciun ligure a-a prescidensa naçionale de Confindustria. Da-i doî candidæ che gh’ea à l’incomenso da partia s’é passou à zero into gio de pöche settemañe. O Edoardo Garrone, prescidente da Erg, o l’à annonçiou o retio con unna longa lettia: «Beseugna mette un candidou inte condiçioin de poei çernise a squaddra sensa condiçionamenti – o l’à scrito –. A deçixon de mette o fin davanti a-a persoña a m’impoñe de fâ un passo inderê». O Garrone o s’ea misso in zeugo dòppo o Antonio Gozzi, prescidente de Federacciai, stæto però taggiou feua da-i savi. À sto ponto arresta solo o Emanuele Orsini. «No gh’é stæto assæ giudiçio pe zugâ a partia», o commento do prescidente ligure Giovanni Toti.

Traduçion italiaña

Confindustria, la Liguria perde la partita della presidenza

Non ci sarà nessun ligure alla presidenza nazionale di Confindustria. Dai due candidati presenti all’inizio della partita si è passati a zero nel giro di poche settimane. Edoardo Garrone, presidente della Erg, ha annunciato il ritiro con una lunga lettera: «Bisogna mettere un candidato nelle condizioni di potersi scegliere la squadra senza condizionamenti – ha scritto –. La decisione di anteporre il fine alla persona mi impone di fare un passo indietro». Garrone si era messo in gioco dopo Antonio Gozzi, presidente di Federacciai, escluso però dai saggi. A questo punto resta solo Emanuele Orsini. «Non c’è stata sufficiente maturità per giocare la partita», il commento del presidente ligure Giovanni Toti.

E notiçie da l’Italia

Senti a verscion registrâ:

Maggioransa unia à defeisa di ministri, oppoxiçion scciappâ in scê eleçioin

Ninte çensua pe-i ministri Salvini e Santanchè, o primmo pe-e relaçioin co-o partio Ruscia Unia do Putin, a segonda pe l’investigaçion in sce Visibilia. A Lega a l’à dito che i propòxiti de conlaboraçion do 2017 «no van ciù ninte dòppo l’invaxon de l’Ucraina». A ministra do Turiximo a s’é dita queta: «Vaggo avanti à fâ o mæ travaggio». E se a maggioransa a se strenze d’in gio a-o governo, l’oppoxiçion a se scciappa in scê eleçioin à Bari dòppo i eutto arresti in Pulia pe-i voti de scangio accattæ à 50 euro. «No gh’é ciù e condiçioin pe-e primmäie», o l’à annonçiou o cappo di 5 Stelle Giuseppe Conte. Pe-a segrettäia do Pd Elly Schlein unna deçixon «imposcibile da capî», e l’accaxoñan: «O veu fâ guägnâ a drita»

Traduçion italiaña

Maggioranza unita a difesa dei ministri, opposizione spaccata sulle elezioni

Niente sfiducia per i ministri Salvini e Santanchè, il primo per le relazioni col partito Russia Unita di Putin, la seconda per l’inchiesta su Visibilia. La Lega ha detto che i propositi di collaborazione del 2017 «non hanno più valore dopo l’invasione dell’Ucraina». La ministra del Turismo si è detta tranquilla: «Continuo a fare il mio lavoro». E se la maggioranza si compatta intorno al governo, l’opposizione si spacca sulle elezioni a Bari dopo gli otto arresti in Puglia per i voti di scambio comprati a 50 euro. «Non ci sono più le condizioni per le primarie», ha annunciato il leader dei 5 Stelle Giuseppe Conte. Per la segretaria del Pd Elly Schlein una decisione «incomprensibile», e lo accusano: «Vuole far vincere la destra».

Caxo Salis, o Mattarella o ciamma o poæ. L’Ongaia: «A no l’é unn’eroiña»

O prescidente da Repubrica Sergio Mattarella o l’à telefonou a-o Roberto Salis, o poæ de l’attivista Ilaria imprexonâ da 13 meixi in Ongaia. «O m’à confermou a seu vexinansa e o m’à garantio o seu interessamento, ô ringraçio», o l’à dito o Salis. «O m’à imprescionou, son contenta», a l’à commentou a figgia. Ma o portavoxe do primmo ministro Viktor Orban o î attacca: «A Ilaria Salis a no l’é unn’eroiña, lê e i seu compagni an commisso de aggrescioin da bestie e premeditæ contra di nòstri çittæn. Tutto o resto o l’é unn’invençion politica». O Pd o l’asmòrta e voxe: «A no saià candidâ a-e europee».

Traduçion italiaña

Caso Salis, Mattarella il padre. L’Ungheria: «Non è un’eroina»

Il presidente della Repubblica Sergio Mattarella ha telefonato a Roberto Salis, il padre dell’attivista Ilaria detenuta da 13 mesi in Ungheria. «Mi ha confermato la sua vicinanza e mi ha garantito il suo interessamento, lo ringrazio», ha detto Salis. «Mi ha impressionato, sono contenta», ha commentato la figlia. Ma il portavoce del primo ministro Viktor Orban li attacca: «Ilaria Salis non è un’eroina, lei e i suoi compagni hanno commesso aggressioni brutali e premeditate contro nostri cittadini. Tutto il resto è un’invenzione politica». Il Pd spegne le voci: «Non sarà candidata alle europee».

Pasqua co-o tempo grammo, ma arriva za o cado estivo

Ponte de Pasqua segnou da-o tempo grammo into Nòrd Italia, tanto che into Mezogiorno s’anava a-a mæña. Primma l’æña do Sahara, rebellâ da-o sciöco, ch’a l’à portou da neive rossa in scê Arpe. Dapeu l’ægua à deruo ch’a l’à caxonou frañe e valanghe e a l’à fæto montâ o livello di sciummi. Ma oua cangia tutto graçie à l’antiçiclon african ch’o l’assegua temperatue ben ben ciù in là da media da primmaveia: fiña 30 graddi in sciô cian, 20 graddi in montagna à 2mia metri. In prattica e primme giornæ de stæ, a-o prinçipio d’arvî. Da lì à no guæi dovieiva tornâ e tempeste, ma o l’é un scenäio ch’o no lascia pensâ ninte de bon pe-i meixi che vëgnan.

Traduçion italiaña

Pasqua col maltempo, ma arriva già il caldo estivo

Ponte di Pasqua segnato dal maltempo nel Nord Italia, mentre nel Mezzogiorno si andava al mare. Prima la sabbia del Sahara, trasportata dallo scirocco, che ha portato neve rossa sulle Alpi. Poi la pioggia intensa che ha provocato frane e valanghe e ha fatto alzare il livello dei fiumi. Ma ora cambia tutto grazie all’anticiclone africano che assicura temperature molto oltre la media primaverile: fino a 30 gradi in pianura, 20 gradi in montagna a 2mila metri. In pratica le prime giornate d’estate, all’inizio di aprile. Poco dopo dovrebbero tornare i temporali, ma è uno scenario che non lascia presagire niente di buono per i mesi successivi.

E notiçie da-o mondo

Senti a verscion registrâ:

Isræle contra l’Iran, ma o Netanyahu o l’é à sequæo

Isræle o l’à attaccou l’ambasciâ irianaña in Sciria e Hezbollah o l’à menassou: «De seguo ghe saià unna respòsta». À reisego i obiettivi isrælien inte tutto o mondo. Intanto o prescidente Netanyahu o l’é à sequæo: tanto che monta e proteste inte ciasse, o ministro da Guæra Gantz o l’à ciammou e eleçioin antiçipæ à settembre. Da l’atra parte, Gran Bretagna e Stati Unii son inveninæ pe-a mòrte de 7 volontäi de l’organizzaçion World Central Kitchen à Gazza. Pe-o Netanayahu «un caxo tragico». O Biden o gh’à telefonou pe dîghe de cangiâ de registro inta gestion da guæra. E anche l’Euröpa a l’é in allarme pe l’evoluçion de tenscioin into Levante de Mezo.

Traduçion italiaña

Israele contro l’Iran, ma Netanyahu è alle strette

Israele ha attaccato l’ambasciata iraniana in Siria e Hezbollah ha minacciato: «Di sicuro ci sarà una risposta». A rischio gli obiettivi israeliani in tutto il mondo. Intanto il presidente Netanyahu è alle strette: mentre crescono le proteste nelle piazze, il ministro della Guerra Gantz ha invocato le elezioni anticipate a settembre. D’altra parte, Gran Bretagna e Stati Uniti sono infuriati per la morte di 7 volontari dell’organizzazione World Central Kitchen a Gaza. Per Netanyahu «un caso tragico». Biden gli ha telefonato per dirgli di cambiare registro nella gestione della guerra. E anche l’Europa è in allarme per l’evoluzione delle tensioni in Medio Oriente.

Relaçioin Ruscia-Nato «da confronto diretto», l’Ucraina a temme o pezo

«E relaçioin tra a Ruscia e a Nato son deschinæ a-o livello de un confronto diretto». Son e poule do Dmitrij Peskov, o portavoxe do Cremlin, perché «l’Alleansa a l’é za drento a-o conflitto in Ucraina e a va avanti con l’espanscion de seu infrastruttue militare verso i nòstri confin», o l’à dito. Intanto Kiev a l’avverte l’Euröpa: davanti a-i 300mia sordatti in ciù che Mosca a mobilitià da zugno gh’é o gròsso reisego che o fronte o pòsse vegnî zu. O governo ruscio o l’accaxoña l’Ucraina davanti a-e Corte internaçionale de giustiçia pe di atti de terroriximo, levou pe-o momento a strage da Crocus City Hall, pe-a quæ, segondo o Washington Post, i Stati Unii avieivan avvisou Mosca ciù de doe settemañe avanti.

Traduçion italiaña

Relazioni Russia-Nato «da confronto diretto», l’Ucraina teme il peggio

«Le relazioni tra la Russia e la Nato sono scivolate al livello di un confronto diretto». Sono le parole di Dmitrij Peskov, portavoce del Cremlino, perché «l’Alleanza è già coinvolta nel conflitto in Ucraina e continua nell’espansione delle sue infrastrutture militari verso i nostri confini», ha detto. Intanto Kiev avverte l’Europa: davanti ai 300mila soldati in più che Mosca mobiliterà da giugno c’è il grande rischio che il fronte possa cedere. Il governo russo accusa l’Ucraina davanti alle Corti internazionali di giustizia per atti di terrorismo, esclusa al momento la strage del Crocus City Hall, per la quale, secondo il Washington Post, gli Stati Uniti avrebbero avvisato Mosca più di due settimane prima.

Tæramòtto de 7,4 graddi à Taiwan, palaçi deruæ e mòrti

Tæramòtto devastante à Taiwan, o ciù grande di urtimi 25 anni. Doî scrolloin, un de 7,4 e un atro de 6,5 graddi Richter, an caxonou a-o manco neuve mòrti, con çentanæa de ferii e dexeñe de persoñe desperse. Ben ben de palaçi se son cegæ ò son cheiti à tòcchi apreuvo a-a liquefaçion do terren. O tæramòtto o l’à corpio à 8 oe da mattin, quande tante gente ean in gio pe anâ a-o travaggio e a-a scheua. L’é partio anche un allarme tsunami, tornou inderê da lì à quarche oa. Solidarietæ da tutto o mondo pronto à aggiuttâ, compreiso à Ciña. Un atro tæramòtto, de 4,7 graddi, o l’é vegnuo into New Jersey, inti Stati Unii, sentio à Neuva York ascì.

Traduçion italiaña

Terremoto de magnitudo 7,4 a Taiwan, palazzi crollati e morti

Terremoto devastante a Taiwan, il più grande degli ultimi 25 anni. Due scosse, una di 7,4 e l’altra di 6,5 gradi sulla scala Richter, hanno causato almeno nove morti, con centinaia di feriti e decine di persone disperse. Molti palazzi si sono inclinati o sono caduti a pezzi per effetto della liquefazione del terreno. Il terremoto ha colpito alle 8 del mattino, quando molta gente era in giro per andare al lavoro e a scuola. È scattato anche un allarme tsunami, rientrato dopo qualche ora. Solidarietà da tutto il mondo pronto ad aiutare, compresa la Cina. Un altro terremoto, di magnitudo 4.7, si è verificato nel New Jersey, negli Stati Uniti, avvertito anche a New York.