O Zinâ

Ediçion

E notiçie da-a Liguria

Senti a verscion registrâ:

Dònna accotellâ da-o nevo à Riva Trigoso, a l’é grave

Un òmmo de 44 anni, o Christian Frediani, o l’à accotellou inta goa a lalla de 57 anni dòppo unna rattella. O l’é capitou inta neutte tra-i 13 e i 14 de frevâ à Riva Trigoso. A dònna a l’é stæta portâ in condiçioin grave à l’uspiâ San Martin de Zena. O nevo, imbriægo, o l’à ferio ascì a moæ de 70 anni ch’a s’é rotta unna gamba into çercâ de defende a seu. O Frediani o l’é stæto arrestou e misso in prexon à Marasci pe tentativo d’ammassamento e lexoin. Inta mæxima famiggia, do 1995, o messiao de l’òmmo o l’aiva ammassou a figgia, a seu de dònne aggredie, e o l’aiva çercou d’ammassâse: o gh’ea arriëscio solo dòppo sciortio d’into manicòmio criminale.

Traduçion italiaña

Donna accoltellata dal nipote a Riva Trigoso, è grave

Un uomo di 44 anni, Christian Frediani, ha accoltellato alla gola la zia di 57 anni dopo una lite. È successo nella notte tra il 13 e il 14 febbraio a Riva Trigoso. La donna è stata portata in gravi condizioni all’ospedale San Martino di Genova. Il nipote, ubriaco, ha ferito anche la madre di 70 anni che si è rotta una gamba cercando di difendere la sorella. Frediani è stato arrestato e messo in carcere a Marassi per tentato omicidio e lesioni. Nella stessa famiglia, nel 1995, il nonno dell’uomo aveva ucciso la figlia, sorella delle donne aggredite, e aveva tentato di uccidersi: c’era riuscito solo una volta uscito dal manicomio criminale.

O Bassetti accaxonou: «Speçializzandi sfrütæ e sensa tutor», parte a quæla

O Matteo Bassetti, o direttô da clinica de moutie infettive de l’uspiâ San Martin de Zena, o l’é stæto accaxonou da l’Assoçiaçion liberi speçializzandi perché, in sciâ base de un questionäio anònimo, i meghi da seu scheua saieivan costreiti à travaggiâ ciù de l’oräio dovuo e staieivan de spesso sensa un tutor. L’infettivòlogo o manda inderê tutti i accaxonamenti e o l’annonçia unna quæla contra o scindicato: «Unna brutta stöia de giöxia», o l’à commentou. I speçializzandi zeneixi in moutie infettive an firmou unna lettia pe piggiâ e distanse da l’Assoçiaçion: «Travaggiâ de ciù a l’é unna nòstra deçixon – scrivan – e con noiatri gh’é delongo un mego esperto». Ma o scindicato o l’insciste: «L’é unna vergheugna che o Bassetti o ne menasse, aniemo avanti pe descrovî a veitæ».

Traduçion italiaña

Bassetti sotto accusa: «Specializzandi sfruttati e senza tutor», parte la querela

Matteo Bassetti, direttore della clinica di malattie infettive dell’ospedale San Martino di Genova, è stato accusato dall’Associazione liberi specializzandi perché, sulla base di un questionario anonimo, i medici della sua scuola sarebbero costretti a travaggiare più dell’orario dovuto e starebbero spesso senza un tutor. L’infettivologo respinge tutte le accuse e annuncia una querela contro il sindacato: «Una brutta storia di invidia», ha commentato. Gli specializzandi genovesi in malattie infettive hanno firmato una lettera per prendere le distanze dall’Associazione: «Lavorare di più è una nostra scelta – scrivono – e con noi c’è sempre un medico strutturato». Ma il sindacato insiste: «È una vergogna che Bassetti ci minacci, andremo avanti per scoprire la verità».

Sanremmo, ciù de 200mia euro de refæta a-o «cantonê in miande»

O Commun de Sanremmo o dovià pagâ 227mia euro e passa de refæta a-o passou cantonê Alberto Muraglia ch’o l’ea stæto scorrio apreuvo à l’operaçion Stachanov da Guardia de finansa pe sfrouxo a-i danni do Stato. O Muraglia o l’ea finio in sce tutti i giornali pe-a fotografia ch’a ô repiggiava tanto ch’o timbrava o cartellin in miande. Ma o seu avvocato into proçesso o l’aiva mostrou che in veitæ o comensava à travaggiâ fiña in antiçipo. Dòppo o retio do liçençiamento in Appello, o Commun o l’é stæto condannou à piggiâlo torna e à dâghe i danni. In sciâ costion peisa ancon un recorso in Cassaçion presentou da-a segrettäia generale do palaçio Bellevue: s’o fïse reçevuo, o Muraglia o porrieiva dovei rende l’indennizzo.

Traduçion italiaña

Sanremo, oltre 200mila euro di risarcimento al «vigile in mutande»

Il Comune di Sanremo dovrà pagare più di 227mila euro di risarcimento all’ex vigile Alberto Muraglia che era stato licenziato in seguito all’operazione Stachanov della Guardia di finanza per truffa ai danni dello Stato. Muraglia era finito su tutti i giornali per la fotografia che lo ritraeva mentre timbrava il cartellino in mutande. Ma il suo avvocato nel processo aveva dimostrato che in realtà cominciava a lavorare perfino in anticipo. Dopo la revoca del licenziamento in Appello, il Comune è stato condannato a reintegrarlo e a riconoscergli i danni. Sulla vicenda pesa ancora un ricorso in Cassazione presentato dalla segretaria generale di palazzo Bellevue: se fosse accolto, Muraglia potrebbe dover restituire l’indennizzo.

E notiçie da l’Italia

Senti a verscion registrâ:

O l’ammassa a moggê e i figgi: «Voeiva liberâli da-o diao»

O l’à ammassou a moggê e i figgi de 5 e 16 anni perché o voeiva «liberâli da-i demònni» e o l’à bruxou o còrpo da dònna avanti d’assotterrâla into giardin. O l’é capitou à Altavilla Milicia, vexin à Palermo. Protagonista un òmmo de 54 anni, o Giovanni Barreca, che dapeu o s’é consegnou a-i carabinê. Insemme à lê l’é stæto fermou atri doî fanatichi religioxi. O Barreca, ch’o l’aiva frequentou unna gexa evangelica, o l’aiva unn’ossescion pe-o diao. A figgia de 17 anni, scampâ a-a strage, a l’é stæta fermâ pe ammassamento perché a l’avieiva parteçipou à di riti. Lê mæxima a l’à contou che l’ea di anni che gh’ea di «demònni» in cà e che besognava scorrîli. À Cisterna de Latina un militare da Guardia di finansa de 27 anni o l’à ammassou con l’arma d’ordinansa a moæ e a seu da passâ galante, co-a quæ o l’aiva rattellou: a figgia a s’é sarvâ ascondendose into bagno.

Traduçion italiaña

Uccide la moglie e i figli: «Volevo liberali dal diavolo»

Ha ucciso la moglie e i figli di 5 e 16 anni perché voleva «liberarli dai demoni» e ha bruciato il corpo della donna prima di seppellirla in giardino. È successo a Altavilla Milicia, vicino a Palermo. Protagonista un uomo di 54 anni, Giovanni Barreca, che poi si è consegnato ai carabinieri. Insieme a lui sono stati fermati altri due fanatici religiosi. Barreca, che aveva frequentato una chiesa evangelica, aveva un’ossessione per il diavolo. La figlia di 17 anni, scampata alla strage, è stata fermata per omicidio perché avrebbe partecipato ad alcuni riti. Lei stessa ha raccontato che da anni c’erano «demoni» in casa e che bisognava scacciarli. A Cisterna di Latina un militare della Guardia di finanza 27enne ha ucciso con l’arma d’ordinanza la madre e la sorella dell’ex fidanzata, con cui aveva litigato: la ragazza si è salvata nascondendosi in bagno.

Squascio into cantê de l’Esselunga, trei mòrti à Firense

Trei operäi son mòrti à Firense into squascio de un cantê pe-a construçion de un supermercou de l’Esselunga a-i 16 de frevâ. Atri doî louanti son despersci con pöche speranse de trovâli vivi. Doî di trei ferii son gravi, ma no van à reisego de moî. Unna trave de ciumento armou a-o quarto cian a l’é vegnua zu da unna banda e a l’à caxonou di atri derui ch’an investio unna squaddra d’eutto operäi. O prescidente da Repubrica Sergio Mattarella e a prescidente de l’Esselunga Marina Caprotti an espresso o seu dô de cheu. I atri supermercoei da cadeña in çittæ son arrestæ serræ pe unna meza giornâ. A Procua a l’à averto unn’investigaçion pe deruo corposo e ammassamento corposo. O cantê o l’é stæto sexio. I scindicati an ciammou un sciòpero naçionale pe-i 21 de frevâ.

Traduçion italiaña

Crollo nel cantiere Esselunga, tre morti a Firenze

Tre operai sono morti a Firenze nel crollo di un cantiere per la costruzione di un supermercato Esselunga il 16 febbraio. Altri due lavoratori sono dispersi con poche speranze di trovarli vivi. Due dei tre feriti sono gravi, ma non in pericolo di vita. Una trave di cemento armato al quarto piano ha ceduto da un lato e ha causato altri crolli che hanno investito una squadra di otto operai. Il presidente della Repubblica Sergio Mattarella e la presidente di Esselunga Marina Caprotti hanno espresso il loro cordiglio. Gli altri supermercati della catena in città sono rimasti chiusi per mezza giornata. La Procura ha aperto un’inchiesta per crollo colposo e omicidio colposo. Il cantiere è stato sequestrato. I sindacati hanno proclamato uno sciopero nazionale per il 21 febbraio.

«Basta genoçidio», ondâ de polemiche in sciâ Rai dòppo Sanremmo

Un sciumme de polemiche dòppo o Festival de Sanremmo apreuvo à l’appello do Ghali «Basta genoçidio» fæto d’in sciô parco. «L’é vergognoso che o Festival o segge stæto sfrütou pe spantegâ de l’agrua», o l’à dito l’ambasciou d’Isræle in Italia. A-a domenega o cantante, intervistou à Domenica In, o l’à respòsto: «Va avanti a politica do terrô, e gente an poia de parlâ contra a guæra». Ma inta mæxima trasmiscion l’é stæto lezzuo unna communicaçion de l’amministratô delegou da Rai con l’esprescion de «solidarietæ pe-o pòpolo d’Isræle», sensa minsonâ Gazza. E oppoxiçioin in scê barricæ: «A libertæ d’esprescion a va rispettâ». A Venier a l’à parlou in scî giornali: «No ò mai fæto da çensua à nisciun». Proteste e scontri davanti a-a sede da Rai à Napoli.

Traduçion italiaña

«Basta genocidio», ondata di polemiche sulla Rai dopo Sanremo

Un fiume di polemiche dopo il Festival di Sanremo a partire dall’appello di Ghali «Basta genocidio» lanciato dal palco. «È vergognoso che il Festival sia stato sfruttato per diffondere odio», ha detto l’ambasciatore di Israele in Italia. Domenica il cantante, intervistato a Domenica In, ha risposto: «Continua la politica del terrore, la gente ha paura di parlare contro la guerra». Ma nella stessa trasmissione è stato letto un comunicato dell’amministratore delegato della Rai con l’espressione di «solidarietà per il popolo di Israele», senza citare Gaza. Le opposizioni sulle barricate: «La libertà di espressione va rispettata». Venier ha parlato sui giornali: «Non ho mai censurato nessuno». Proteste e scontri davanti alla sede della Rai a Napoli.

E notiçie da-o mondo

Senti a verscion registrâ:

Ruscia, mòrto o prexonê Navalny: o Biden o l’accaxoña o Cremlin

L’é mòrto in Ruscia de 47 anni o Alexei Navalny, o prinçipâ oppoxitô politico do prescidente Vladimir Putin. O l’ea imprexonou inte unna colònia penale artica donde o scontava unna peña de 19 anni. Segondo e autoritæ penitençiäie o l’é stæto piggiou da un patî dòppo unna passaggiâ. O Navalny o no paiva aveighe di problemi de sanitæ: seu moæ a l’aiva trovou «san e allegro» inte unna vixita a-i 12 de frevâ. De seguo ghe pesava i confinamenti inta çella pe puniçion. Ma tanti cappi de Stato – o Joe Biden pe-o primmo, ch’o dixe de no ëse mäveggiou – pontan o dio in sciô Cremlin, ch’o parla d’accaxonamenti «che no se peuan açettâ». Da chì à un meise ghe saià e eleçioin e o Putin o se candidià pe-a quinta vòtta.

Traduçion italiaña

Russia, morto il prigioniero Nalvalny: Biden accusa il Cremlino

È morto in Russia a 47 anni Alexei Navalny, principale oppositore politico del presidente Vladimir Putin. Era incarcerato in una colonia penale artica dove scontava una pena di 19 anni. Secondo le autorità penitenziarie è stato colto da malore dopo una passeggiata. Navalny non sembrava avere problemi di salute: sua madre lo aveva trovato «sano e allegro» in una visita il 12 febbraio. Di certo gli pesavano i confinamenti in cella per punizione. Ma diversi capi di Stato – Joe Biden per primo, che dice di non essere sorpreso – puntano il dito sul Cremlino, che parla di accuse «inaccettabili». Tra un mese ci saranno le elezioni e Putin si candiderà per la quinta volta.

Isræle, tenscion con l’Euröpa e o Vatican. No gh’é l’accòrdio in scî ostaggi

«Oua basta, che Isræle o s’afferme». À piggiâ unna poxiçion in scî attacchi à Gazza l’é ascì a Gran Bretagna e l’Union Europea. O Washington Post o l’à parlou de unna «rottua» tra o Biden e o Netanyahu da chì à no guæi. E a tenscion a l’é montâ ascì co-o Vatican: o segrettäio de Stato, o cardinâ Parolin, o l’à definio «stramesuâ» a reaçion d’Isræle contra Hamas perché «o drito a-a defeisa o no giustifica un maxello», azzonze a Santa Sede. Intanto manca ancon un accòrdio in scî ostaggi e o Stato ebraico o l’avverte: «Devan tornâ sedonca allarghiemo l’açion à Rafah». I Stati Unii e i Paixi arabi travaggian pe un cian de paxe ch’o prevedde l’instituçion de un Stato palestineise, ma o Netanyahu o no se mescia: «Ninte regalli e ninte diktat internaçionali».

Traduçion italiaña

Israele, tensione con l’Europa e il Vaticano. Non c’è l’accordio sugli ostaggi

«Ora basta, Israele si fermi». A prendere posizione sugli attacchi a Gaza sono anche la Gran Bretagna e l’Unione Europea. Il Washington Post ha parlato di una «rottura» imminente tra Biden e Netanyahu. E la tensione è salita anche col Vaticano: il segretario di Stato, il cardinal Parolin, ha definito «sproprozionata» la reazione di Israele contro Hamas perché «il diritto alla difesa non giustifica il genocidio», aggiunge la Santa Seda. Intanto manca ancora un accordo sugli ostaggi e lo Stato ebraico avverte: «Devono tornare altrimenti allargheremo l’azione a Rafah». Gli Stati Uniti e i Paesi arabi lavorano per un piano di pace che prevede l’istituzione di uno Stato palestinese, ma Netanyahu non si muove: «Niente regali e niente diktat internazionali».

L’Euröpa a taggia e stimme de crescita, a Lagarde cianin in scî tasci

A Commiscion europea a l’à taggiou e stimme de crescita do Pil pe l’Eurozöna do 2024, da l’1,2% a-o 0,8%. Se prevedde de repiggiâ l’asbrio cian cianin inte l’anno pe cresce ciù stabili da-o 2025. A prescidente da Banca çentrale europea Lagarde a va cianin in sciâ deschinâ di tasci: «A deflaçion a va avanti, pe deçidde ammiemo i dæti, ma serve ciù seguesse». A revixon de stimme a l’interessa l’Italia ascì e oua torna o fantaxima de unna maneuvra in azzonta. O Gentiloni però o freña: «No femmo de correçioin in scî citti, in sce l’avvegnî dòmina l’inseguessa».

Traduçion italiaña

L’Europa taglia le stime di crescita, Lagarde cauta sui tassi

La Commissione europea ha tagliato le stime di crescita del Pil per l’Eurozona nel 2024, dall’1,2% allo 0,8%. Si prevede di accelerare di nuovo gradualmente nel corso dell’anno per crescere più stabilmente dal 2025. La presidente della Banca centrale europea Lagarde frena sulla diminuzione dei tassi: «La deflazione va avanti, per decidere guarderemo i dati, ma servono più certezze». La revisione delle stime interessa anche l’Italia e ora torna lo spettro di una manovra aggiuntiva. Gentiloni però frena: «Non facciamo correzioni sullo zero virgola, sul futuro domina l’incertezza».