O Zinâ

Ediçion

E notiçie da-a Liguria

Senti a verscion registrâ:

Lebecciadda e tempo grammo in Liguria, danni da-o mâ a l’entrotæra

Unna fòrte lebecciadda à s’é abbattua a-i 3 de novembre in sce Zena e e rivee da Liguria, in particolâ quella de Levante, caxonando di guasti, di asciddi e di ferii. I mouxi, erti 6 metri e passa, son arrivæ in scê stradde e an allagou ben ben di sciti. À Camoggi un ristorante o l’é vegnuo zu. À Sestri Levante o mâ o l’é introu inti carroggi do paise. À Zena un òmmo o l’é stæto investio da unn’onda à Ponta Vagno e o l’é finio in rianimaçion à l’uspiâ San Martin. L’Aurelia a l’é stæta serrâ pe ciù træti da Levante à Ponente, problemi ascì pe-i treni. Danni in scê passaggiæ de Nervi e Otri. O prescidente da Region Giovanni Toti o l’à annonçiou ch’o domandià o stato d’emergensa e o l’à convocou e assoçiaçioin de categoria pe-a conta di guasti. Inti giorni avanti o tempo grammo o l’aiva mandou in crixi l’entrotæra con dëxeñe de frañe, stradde serræ, sciummi in piña, miggiæa de gente sensa luxe, venti a 200 km/h. Pe l’allerta meteo tutti i çemetëi à Zena son restæ serræ into giorno di mòrti.

Traduçion italiaña

Mareggiata e maltempo in Liguria, danni dal mare all’entroterra

Una forte mareggiata di libeccio si è abbattuta il 3 novembre su Genova e le riviere della Liguria, in particolare quella di Levante, causando danni, disagi e feriti. I marosi, alti più di 6 metri, sono arrivati sulle strade e hanno allagato diversi locali. A Camogli un ristorante è crollato. A Sestri Levante il mare è entrato nel centro storico del paese. A Genova un uomo è stato travolto da un’onda a Punta Vagno ed è finito in rianimazione all’ospedale San Martino. L’Aurelia è stata chiusa in più tratti da Levante a Ponente, problemi anche per i treni. Danni sulle passeggiate di Nervi e Voltri. Il presidente della Regione Giovanni Toti ha annunciato che chiederà lo stato d’emergenza e ha convocato le associazioni di categoria per la conta dei danni. Nei giorni precedenti il maltempo aveva mandato in crisi l’entroterra con decine di frane, strade chiuse, fiumi in piena, migliaia di persone senza luce, venti a 200 km/h. Per l’allerta meteo tutti i cimiteri a Genova sono rimasti chiusi nel giorno dei defunti.

«Pronto à moî pe-a jihad», arrestou à Zena pe terroriximo

Un òmmo de 22 anni originäio do Bangladesh o l’é stæto arrestou da-a poliçia de Zena pe terroriximo. Da l’investigaçion da Digos, duâ pe doî anni, l’é vegnuo feua ch’o parteçipava à un’organizzaçion ligâ à Al-Qaeda ch’a veu fondâ un emirato islamico in Pakistan. O Faysal Rahman, ch’o travaggiava inti cantê de Sestri Ponente, o se deciarava «sordatto de Allah» e «pronto a-o martirio», o l’instigava a-a jihad e a-a violensa con pubricâ e commentâ un muggio di video in sciâ Ræ e o l’ea apreuvo à imprende à deuviâ de arme da feugo, tra e quæ unna mitraggia. A Digos a l’à fæto ascì de perquixiçioin in sce doî indagæ, un atro zoeno do Bangladesh ch’o sta a Mantova e un predicatô islamico.

Traduçion italiaña

«Pronto a morire per la jihad», arrestato a Genova per terrorismo

Un uomo di 22 anni originario del Bangladesh è stato arrestato dalla polizia di Genova per terrorismo. Dall’indagine della Digos, durata due anni, è emerso che partecipava a un’organizzazione legata ad Al- Qaeda chi vuole fondare un emirato islamico in Pakistan. Faysal Rahman, che lavorava nei cantieri di Sestri Ponente, si dichiarava «soldato di Allah» e «pronto al martirio», istigava alla jihad e alla violenza pubblicando e commentando svariati video online e stava imparando a usare armi da fuoco, tra cui un mitragliatore. La Digos ha effettuato anche perquisizioni su due indagati, un altro giovane del Bangladesh che risiede a Mantova e un predicatore islamico.

Dònna strangoâ da-o maio à Saña, mòrta dòppo doî giorni

Unna dònna de 31 anni, a Etleva Bodi, a l’é mòrta dòppo ch’a l’é stæta strangoâ da seu maio Selami Bodi à Saña inta neutte tra i 28 e i 29 d’ottobre. Moæ de quattro figgi, a l’ea stæta recoverâ in condiçioin critiche à l’uspiâ San Poulo. O maio o l’é stæto arrestou pe assascinio e i figgeu – o ciù grande o l’à 13 anni – son stæti consegnæ à un barba. Tutto l’ea comensou in cà da cobia à Villaciaña: dòppo unna violenta rattella a dònna a s’ea serrâ inta stançia ma l’òmmo, dex’anni ciù grande che lê, o l’à sentio ch’a parlava a-o telefono: fòscia piggiou da-a giöxia, o gh’à misso e moen a-o còllo e o l’à streito sempre ciù fòrte fin ch’o l’à visto ch’a no respiava ciù. Da lì à doî giorni a l’à finio de vive.

Traduçion italiaña

Donna strangolata dal marito a Savona, morta dopo due giorni

È morta la donna di 31 anni, Etleva Bodi, è morta dopo essere stata strangolata da suo marito Selami Bodi a Savona nella notte tra il 28 e il 29 ottobre. Madre di quattro figli, era stata ricoverata in condizioni critiche all’ospedale San Paolo. Il marito è stato arrestato per omicidio e i ragazzi – il più grande ha 13 anni – sono stati affidati a uno zio. Tutto era iniziato in casa della coppia a Villapiana: dopo una violenta lite la donna si era chiusa in camera ma l’uomo, di dieci anni più grande di lei, ha sentito che parlava al telefono: forse in preda alla gelosia, le ha messo le mani al collo e ha stretto sempre più forte finché ha visto che non respirava più. Dopo due giorni ha smesso di vivere.

E notiçie da l’Italia

Senti a verscion registrâ:

Alluvion in Toscaña, a-o manco sëi mòrti

Toscaña in zenoggio pe l’alluvion. A-o manco sëi i mòrti e doî i despersci apreuvo à l’esondaçion do Bisenzio inta zöna de Prato inta seiaña di 2 de novembre, quande a tempesta Ciaran a l’à investio l’Italia. Çentanæa de persoñe son ancon in difficortæ e se ghe peu arrivâ solo con di gommoin ò di elicòtteri. I scindichi an invitou a popolaçion à stâ a-i cen de d’ato. Allagou l’uspiâ de Pontedera. O prescidente Giani o l’à parlou de «scituaçion davei graviscima» e o l’à annonçiou o stato d’emergensa. Stramesuæ i danni pe-e attivitæ produttive, segondo a Confindustria.

Traduçion italiaña

Alluvione in Toscana, almeno sei morti

Toscana in ginocchio per l’alluvione. Almeno sei i morti e due i dispersi in seguito all’esondazione del Bisenzio nella zona di Prato nella serata del 2 novembre, quando la tempesta Ciaran ha investito l’Italia. Centinaia di persone sono ancora in difficoltà e sono raggiungibili solo con gommoni o elicotteri. I sindaci hanno invitato la popolazione a stare ai piani superiori. Allagato l’ospedale di Pontedera. Il presidente Giani ha parlato di «situazione davvero gravissima» e ha annunciato lo stato d’emergenza. Ingentissimi i danni per le attività produttive, secondo Confindustria.

Burla telefònica pe-a Meloni: «A guæra in Ucraina? Gh’é tanta stanchessa»

A prescidente do Conseggio Giorgia Meloni a l’é finia vittima de unna burla telefònica de doî còmichi rusci, Vovan e Lexus, un di quæ o s’é fæto passâ pe-o prescidente da Commiscion de l’Union Africaña. I fæti son di 18 de settembre. À un çerto ponto do descorso a Meloni a commenta che «gh’é tanta stanchessa da tutte e parte» in sciâ guæra in Ucraina e che «s’avvexiña o momento che tutti capian ch’emmo beseugno de unna mainea de sciortîne». A prescidente a l’é stæta «vittima de un episòdio de pöca cua», commentan da Palaçio Chigi. Intanto o conseggê diplomatico Francesco Talò o l’à dæto e dimiscioin.

Traduçion italiaña

Scherzo telefonico per Meloni: «La guerra in Ucraina? C’è tanta stanchezza»

La presidente del Consiglio Giorgia Meloni è finita vittima di uno scherzo telefonico di due comici russi, Vovan e Lexus, uno dei quali si è spacciato per il presidente della Commissione dell’Unione Africana. I fatti risalgono al 18 settembre. A un certo punto del discorso Meloni commenta che «c’è tanta stanchezza da tutte le parti» sulla guerra in Ucraina e che «si avvicina il momento in cui tutti capiranno che abbiamo bisogno di una via d’uscita». La presidente è stata «vittima di un episodio di sciatteria», commentano da Palazzo Chigi. Intanto il consigliere diplomatico Francesco Talò ha dato le dimissioni.

Imprexonæ pe traffego de dröga, e doe figge italiañe tornan in libertæ

Son tornæ in libertæ a Amina Milo e a Ilaria De Rosa, e doe figge de 18 e 24 anni arrestæ prexonee in Kazakistan e in Arabia Saudita, a primma pe trei meixi, a segonda pe sëi. Tutte doe ean stæte accaxonæ de traffego de dröga perché, segondo e autoritæ de quelli pòsti, gh’aivan trovou addòsso un pittin de hashish. «Ò passou di momenti drammatichi, oua però son libera», a l’à dito a Milo ch’a l’avieiva patio di abuxi pe-i quæ di poliçiòtti son stæti indagæ. A De Rosa, ch’a travaggiava comme ascistente de xeuo, a l’ea stæta fermâ à cà de un amigo into giardin de unna villa e a l’à sempre denegou i accaxonamenti.

Traduçion italiaña

Incarcerate per traffico di droga, le due ragazze italiane tornano in libertà

Sono tornate in libertà Amina Milo e Ilaria De Rosa, le due ragazze di 18 e 24 anni rimaste prigioniere in Kazakistan e in Arabia Saudita, la prima per tre mesi, la seconda per sei. Entrambe erano state accusate di traffico di droga perché, secondo le autorità locali, trovate in possesso di piccole quantità di hashish. «Ho passato momenti drammatici, ora però sono libera», ha detto Milo che avrebbe subito abusi per i quali alcuni poliziotti sono stati indagati. De Rosa, che lavorava come assistente di volo, era stata fermata a casa di un amico nel giardino di una villa e ha sempre negato le accuse.

E notiçie da-o mondo

Senti a verscion registrâ:

Isræle-Hamas, Gazza delongo sotta e bombe. Allarme antisemitiximo in Euröpa

Va avanti o conflitto tra Hamas e Isræle con di neuvi bombardamenti à Gazza pe-i quæ l’Onu a l’ipotizza di crimini de guæra. I primmi foresti e palestineixi ferii an lasciou a Striscia da-o passo de Rafah. O Pappa inte unn’intervista o l’à propòsto «doî pòpoli, doî stati: ògni guæra a l’é unna perdia». Pe-o cappo de Hamas Ismail Haniyeh l’attentato di 7 d’ottobre o l’é stæto «unna reaçion a-e politiche do governo Netanyahu». In Euröpa intanto monta l’allarme pe l’antisemitiximo: de stelle de David son stæte depente in sce de miage de cæ e banche à Pariggi. Sempre inta capitale franseise unna dònna coverta con un vello a l’à criou «Allahu akbar» inte unna staçion: a poliçia a gh’à tiou, oua a l’é in uspiâ.

Traduçion italiaña

Israele-Hamas, Gaza sempre sotto le bombe. Allarme antisemitismo in Europa

Prosegue il conflitto tra Hamas e Israele con nuovi bombardamenti a Gaza per i quali l’Onu ipotizza crimini di guerra. I primi stranieri e palestinesi feriti hanno lasciato la Striscia attraverso il varco di Rafah. Il Papa in un’intervista ha proposto «due popoli, due stati: ogni guerra è una sconfitta». Per il capo di Hamas Ismail Haniyeh l’attentato del 7 ottobre è stato «una reazione alle politiche del governo Netanyahu». In Europa intanto cresce l’allarme per l’antisemitismo: alcune stelle di David sono state dipinte su muri di abitazioni e banche a Parigi. Sempre nella capitale francese una donna coperta con un velo ha gridato «Allahu akbar» in una stazione: la polizia le ha sparato, ora è in ospedale.

Condannou o «re de cripto-varsciue», o reisega 100 anni de prexon

O Sam Bankman-Fried, fondatô da Ftx tegnuo pe-o re de cripto-varsciue, o l’é stæto giudicou corpeive de tutte sette e imputaçioin ch’o l’aiva adòsso. O l’ea accaxonou d’ëse l’architetto d’uña de ciù gren gazibbe finançiäie da stöia americaña e oua o reisega fin à 100 anni de prexon. A soçietæ Ftx, fondâ do 2019, a l’ea anæta a-o fondo tutt’assemme che l’é un anno con fâ perde di miliardi de dòllari pe ben ben de casañe. Into proçesso anche i seu conlaboratoî ciù streiti, compreiso a seu passâ galante Carolin Ellison, an testimoniou contra de lê.

Traduçion italiaña

Condannato il «re delle criptovalute», rischia 100 anni di carcere

Sam Bankman-Fried, fondatore di Ftx ritenuto il re delle cripto-valute, è stato giudicato colpevole di tutte e sette le imputazioni nei suoi confronti. Era accusato di essere l’architetto di una delle più grandi truffe finanziarie della storia americana e ora rischia fino a 100 anni di carcere. La società Ftx, fondata nel 2019, era crollata improvvisamente un anno fa facendo perdere miliardi di dollari a molti clienti. Nel processo anche i suoi collaboratori più stretti, compresa la sua ex fidanzata Carolin Ellison, hanno testimoniato contro di lui.

Stati Unii, pe-o neuvo speaker da Camia i Romoen son cheiti pe l’omosessualitæ

L’impëio roman o l’é cheito no solo pe-a «depravaçion da soçietæ e a mancansa de moralitæ», ma anche pe corpa do «comportamento omosessuale ch’o se spantegava». À sostegnîlo inte unn’intervista pubricâ da-a Cnn o l’ea o Mike Johnson, repubrican conservatô di ciù dui, elezzuo de fresco speaker da Camia di Stati Unii. O Johnson, fin a-a meitæ di anni Doamia, o l’aiva conlaborou con un gruppo ch’o l’aiva comme intençion quella de «convertî i omosessuali». Inte quelli anni o l’aiva ascì sostegnuo che «o maiezzo tra de persoñe do mæximo sesso o stà da pao co-o maiâ unna bestia de compagnia». De frase che mettan gena fiña a-o partio repubrican che oua o porrieiva convinsilo à aggiustâ o tio.

Traduçion italiaña

Stati Uniti, per il nuovo speaker della Camera i Romani sono caduti per l’omosessualità

L’impero romano è caduto non solo per la «depravazione della società e la mancanza di moralità», ma anche per colpa del «comportamento omosessuale dilagante». A sostenerlo in un’intervista pubblicata dalla Cnn era Mike Johnson, repubblicano conservatore dei più duri, appena eletto speaker della Camera degli Stati Uniti. Johnson, fino alla metà degli anni Duemila, aveva collaborato con un gruppo che aveva come obiettivo quello di «convertire gli omosessuali». In quegli anni aveva anche sostenuto che «il matrimonio tra persone dello stesso sesso è equiparabile a sposare un animale domestico». Frasi che imbarazzano persino il partito repubblicano che ora potrebbe convincerlo ad aggiustare il tiro.