O Zinâ

Ediçion

E notiçie da-a Liguria

Senti a verscion registrâ:

Tempo grammo in Liguria, into Levante i sciummi fan torna poia

Settemaña de tempo grammo in sce Zena e o Levante da Liguria, pe fortuña sensa guæi de danni. A-i 24 d’ottobre a-a seia s’é visciuo di momenti de poia à Recco e Rapallo donde i riæ son stæti in scî pissi d’anâ de sorva apreuvo a-o deruo ch’o l’à portou ciù che 100 millimetri d’ægua inte unn’oa tra o Tigullio e o Gorfo Pareiso. Allagamenti e frañe inte tutta a zöna. L’autostradda A12, vegnua unna pisciña, a l’é stæta serrâ tra Recco e Rapallo. Differenti sciummi an passou o livello de guardia: o Besagno a-a Preisa, l’Entella, a Væa e l’Aito. Inta nottoaña tra-i 26 e i 27 d’ottobre neuva allerta into Spezzin, donde l’é tornou o peson de l’alluvion à 12 anni da-o desastro. Vento fòrte à 100 km/h e passa, dëxeñe d’erboi cheiti in scê stradde, quarche allagamento in çittæ ma sensa de gròsse conseguense. Dapeu o spettacolo di mouxi ascì con doe persoñe ferie à Zena: pe fortuña no son grave. Oua s’aspeta un neuvo pezoamento.

Traduçion italiaña

Maltempo in Liguria, nel Levante i fiumi fanno ancora paura

Settimana di maltempo su Genova e il Levante della Liguria, per fortuna senza troppi danni. Il 24 ottobre sera si sono vissuti momenti di paura a Recco e Rapallo dove i torrenti hanno sfiorato l’esondazione dopo il nubifragio che ha portato oltre 100 millimetri di pioggia in un’ora tra Tigullio e il Golfo Paradiso. Allagamenti e frane in tutta la zona. L’autostrada A12, trasformata in piscina, è stata chiusa tra Recco e Rapallo. Diversi fiumi hanno superato il livello di guardia: il Bisagno alla Presa, l’Entella, il Vara e l’Aveto. Nella nottata tra il 26 e il 27 ottobre nuova allerta nello Spezzino, dove è tornato l’incubo alluvione a 12 anni dal disastro. Vento forte a più di 100 km/g, decine di alberi caduti sulle strade, qualche allagamento in città ma senza grosse conseguenze. Poi lo spettacolo della mareggiata nonostante due persone ferite a Genova: per fortuna non sono gravi. Ora si attende un nuovo peggioramento.

À Zena l’assemblea di scindichi italien, tutti contra i taggi

Zena capitale di commun italien pe trei giorni con l’assemblea naçionale de l’Anci averta a-i 24 d’ottobre da-o prescidente da Repubrica Sergio Mattarella a-o padiggion Jean Nouvel into cantê do Waterfront. De de chì s’é levou o crio di scindichi contra i neuvi taggi a-i enti locali previsti da-o Governo, 600 mioin pe çinque anni: «Sensa dinæ no poemo garantî i serviçi». I primmi çittæn inscistan pe poei fâ o terso mandato, ancheu proibio da-a lezze. Son stæti 14 i ministri intervegnui à l’assemblea, 7mia tra scindichi, amministratoî e òspiti. Presente o commissäio europeo Gentiloni, a Meloni a l’à mandou un messaggio in video. Inte l’occaxon o scindico de Zena Marco Bucci o l’à proposto de dâ un neuvo nomme à l’inno d’Italia: «L’à scrito doî zeneixi, o Mameli e o Novaro: dimmoghe A Zeneise comme à l’inno franseise se ghe dixe A Marseggeise». Unn’idea che in çittæ a no l’é piaxua à tutti.

Traduçion italiaña

A Genova l’assemblea dei sindaci italiani, tutti contro i tagli

Genova capitale dei comuni italiani per tre giorni con l’assemblea nazionale di Anci aperta il 24 ottobre dal presidente della Repubblica Sergio Mattarella al padiglione Jean Nouvel nel cantiere del Waterfront. Da qui si è alzato il grido dei sindaci contro i nuovi tagli agli enti locali previsti dal Governo, 600 milioni per cinque anni: «Senza soldi non possiamo garantire i servizi». I primi cittadini insistono per poter fare il terzo mandato, oggi vietato dalla legge. Sono stati 14 i ministri intervenuti all’assemblea, 7mila tra sindaci, amministratori e ospiti. Presente il commissario europeo Gentiloni, Meloni ha inviato un videomessaggio. Nell’occasione il sindaco di Genova Marco Bucci ha proposto di rinominare l’inno d’Italia: «L’hanno scritto due genovesi, Mameli e Novaro: chiamiamola La Genovese come l’inno francese si chiama La Marsigliese». Un’idea che in città non è piaciuta a tutti.

O særa à ciave i genitoî inta stançia, òmmo arrestou à Zena

Un òmmo de 49 anni o l’é stæto arrestou à Zena perché o l’aiva serrou inta stançia i seu genitoî. I doî ançien, d’83 e 80 anni, no an posciuo fâ atro che ciammâ aggiutto cacciando zu da-o barcon un biggetto appontou à un oegê con scrito: «Semmo serræ in cà, ciammæ quarchedun e vegnî con unna machina sotta o barcon». I fæti son avvegnui inte un appartamento de San Fruttoso into doppodisnâ di 24 d’ottobre. Un ch’o passava de lì o l’à visto o messaggio e o l’à avvertio a poliçia. Da quello che s’é capio, l’òmmo o l’aiva rattellou co-i seu pe de raxoæle, loiatri s’ean trovæ poia e coscì s’ean refollæ inta camia, ma o figgio o l’à serrou co-a ciave e o î à lasciæ lì pe de oe, sensa mangiâ, sensa telefono e fiña sensa luxe. In sciâ fin i doî ançien no an vosciuo denonçiâlo, ma gh’an pensou i poliçiòtti che l’an ligou pe sequestro de persoña.

Traduçion italiaña

Chiude a chiave i genitori in camera, uomo arrestato a Genova

Un uomo di 49 anni è stato arrestato a Genova perché aveva chiuso in camera i suoi genitori. I due anziani, di 83 e 80 anni, non hanno potuto far altro che chiedere aiuto gettando dalla finestra un biglietto attaccato a un cuscino con scritto: «Siamo chiusi in casa, chiamate qualcuno e venite con una macchina sotto la finestra». I fatti sono avvenuti in un appartamento di San Fruttuoso nel pomeriggio del 24 ottobre. Un passante ha visto il messaggio e ha avvertito la polizia. Da quanto accertato, l’uomo aveva litigato coi suoi genitori per futili motivi, loro si erano spaventati e così si erano rifugiati in camera, ma il figlio ha chiuso a chiave e li ha lasciati lì per ore, senza cibo, senza telefono e perfino senza luce. Alla fine i due anziani non hanno voluto denunciarlo, ma ci hanno pensato i poliziotti che lo hanno messo in manette per sequestro di persona.

E notiçie da l’Italia

Senti a verscion registrâ:

A maneuvra in Parlamento, a Meloni: «Nisciun problema co-a maggioransa»

Oe determinante pe-a maneuvra finançiäia ch’a comensa o seu cammin in Parlamento. Tra e ipòtexi vegnue feua inti urtimi giorni gh’ea quella de un prelevamento forsou in scî conti correnti pe chi à di poffi co-o fisco, ma a nòrma a l’é stæta taggiâ feua da-a mæxima prescidente Giorgia Meloni: «No se ne parla», a l’avieiva dito a-i seu. Tra i ponti ciù diffiçili pe unn’inteisa tra e fòrse de maggioransa, stante e prescioin da Lega, gh’é e penscioin: dovieiva bastâ 62 anni d’ançianitæ e 41 de contributi, ma pe reçeive l’assegno besorrià aspëtâ da-i 6 a-i 9 meixi. E dovieiva scentâ l’antiçipo a-o 2024 pe l’adattamento a-a speransa de vitta quæ se segge l’etæ. Fratelli d’Italia a fa sprescia pe tiâ sciù e tasce in scê pixoin turistiche, Forza Italia a ponta i pê. Ma a premier a l’assegua torna: «No gh’é nisciun problema tra mi, o Salvini e o Tajani».

Traduçion italiaña

La manovra in Parlamento, Meloni: «Nessun problema con la maggioranza»

Ore decisive per la manovra finanziaria che inizia il suo iter in Parlamento. Tra le ipotesi emerse negli ultimi giorni c’era quella di un prelievo forzato sui conti correnti per chi ha debiti col fisco, ma la norma è stata esclusa dalla stessa presidente Giorgia Meloni: «Non se ne parla», avrebbe detto ai suoi. Tra i punti più difficili per un’intesa tra le forze di maggioranza, viste le pressioni della Lega, ci sono le pensioni: dovrebbero bastare 62 anni d’anzianità e 41 di contributi, ma per ricevere l’assegno bisognerà aspettare dai 6 ai 9 mesi. E dovrebbe sparire l’anticipo al 2024 per l’adeguamento alla speranza di vita a prescindere dall’età. Fratelli d’Italia incalza per alzare le tasse sugli affitti turistici, Forza Italia punta i piedi. Ma la premier assicura nuovamente: «Non c’è nessun problema tra me, Salvini e Tajani».

In Italia 2 mioin de pövei, o 63% de famigge o fadiga à arrivâ a-a fin do meise

In Italia a-o manco o 63% de famiggie o giamiña à arrivâ a-a fin do meise e ciù che 2 mioin son in povertæ assolua. I dæti son quelli de l’Eurostat e de l’Istat e fotògrafan unna scituaçion in pezoamento. I pövei son l’8,3% de tutta a popolaçion, l’anno passou ean 7,7%, 165mia famigge in ciù. A misëia a l’é caxonâ sorviatutto da-o montâ de l’inflaçion. Drammatico o numeo di minoî in povertæ: 1 mion e 270mia, o 13,4% contra o 12,6% de l’anno passou. Tra chi no l’é pöveo segondo i limiti de convençion, tanti fadigan o mæximo, ben ben de ciù che a media europea ch’a s’afferma à 45,5%. O dæto italian o l’é o ciù pezo tra i gren Paixi e o passa avanti à Germania, Fransa, Polònia, Spagna e Portogallo.

Traduçion italiaña

In Italia 2 milioni di poveri, il 63% delle famiglie fatica ad arrivare alla fine del mese

In Italia almeno il 63% delle famiglie fatica ad arrivare alla fine del mese e più di 2 milioni sono in povertà assoluta. I dati sono quelli di Eurostat e Istat e fotografano una situazione in peggioramento. I poveri sono l’8,3% di tutta la popolazione, l’anno scorso erano il 7,7%, 165mila famiglie in più. L’indigenza è provocata soprattutto dall’aumento dell’inflazione. Drammatico il numero dei minori in povertà: 1 milione e 270mila, il 13,4% contro il 12,6% dell’anno scorso. Tra chi non è povero secondo i limiti convenzionali, tanti faticano lo stesso, molto più della media europea che si ferma al 45,5%. Il dato italiano è il peggiore tra i grandi Paesi e sorpassa Germania, Francia, Polonia, Spagna e Portogallo.

Meghi sançionæ pe «tròppo travaggio», intervëgne o Mattarella

Sançionæ pe avei travaggiou tròppo. O l’é capitou à trei primäi do Policlinico de Bari, destinatäi do provedimento de l’Inspettorato do travaggio ch’o gh’à contestou a violaçion de norme in scê pöse di meghi e di infermê inte l’emergensa Covid. Un caxo ch’o l’à fæto ben ben do sciato: à tiâlo sciù l’é stæto o primäio do pronto soccorso Vito Procacci, ch’o l’à scrito una lettia a-o prescidente da Repubrica Sergio Mattarella. Intanto o prescidente da Federaçion naçionale di Ordini di meghi, o Filippo Anelli, o l’à contattou a ministra Elvira Calderone. A sançion a l’é stæta primma sospeisa da l’Inspettorato, e dapeu scassâ apreuvo à l’intervento do Mattarella. Oua l’Ordine di meghi o domanda a-o Governo un cian straordenäio d’assonçioin.

Traduçion italiaña

Medici multati per «troppo lavoro», interviene Mattarella

Sanzionati per aver lavorato troppo. È capitato a tre primari del Policlinico di Bari, destinatari del provvedimento dell’Ispettorato del lavoro che ha contestato loro la violazione delle norme sulle pause di medici e infermieri durante l’emergenza Covid. Un caso che ha fatto molto rumore: a sollevarlo è stato il primario del pronto soccorso Vito Procacci, che ha scritto una lettera al presidente della Repubblica Sergio Mattarella. Intanto il presidente della Federazione nazionale degli Ordini dei medici, Filippo Anelli, ha contattato la ministra Elvira Calderone. La sanzione è stata prima sospesa dall’Ispettorato, e poi cancellata dopo l’intervento di Mattarella. Ora l’Ordine dei medici chiede al Governo un piano straordinario di assunzioni.

E notiçie da-o mondo

Senti a verscion registrâ:

Isræle o l’incomensa l’attacco de tæra à Gazza, scontro co-o segrettäio de l’Onu

Isræle o l’à comensou un pesante attacco definio «mai visto primma» inta Striscia de Gazza con cari armæ e cannonæ insemme a-i bombardamenti da l’äia. A-i 25 d’ottobre o prescidente Netanyahu o l’aiva confermou l’invaxon de tæra, tegnindola pe-a sola mainea de levâ da mezo Hamas e liberâ i ostaggi. Intanto l’é scciuppou o caxo mediatico in scê poule do segrettäio generale de l’Onu António Guterres davanti a-o Conseggio de seguessa: «L’é importante reconosce che i attacchi de Hamas no son arrivæ da-o ninte. O pòpolo palestineise o l’é stæto sottopòsto à 56 anni d’occupaçion ch’a leva l’äia». O ministro de l’Estranxeo isrælian Cohen o l’à tòsto ciammou e dimiscioin. Ma o Guterres o l’aiva dito ascì che «e proteste do pòpolo palestineise no peuan giustificâ i attacchi de Hamas». E defæti o l’à rebattuo: «L’é fäso ch’agge giustificou i terroristi». De tutt’atro cô e deciaraçioin do prescidente turco Erdogan in sce Hamas: «No son di terroristi ma di liberatoî che scombattan pe-a seu tæra».

Traduçion italiaña

Israele avvia l’attacco di terra a Gaza, scontro col segretario dell’Onu

Israele ha iniziato un pesante attacco definito «senza precedenti» nella Striscia di Gaza con carri armati e colpi d’artiglieria insieme ai bombardamenti aerei. Il 25 ottobre il presidente Netanyahu aveva confermato l’invasione di terra, ritenendola il solo modo per eliminare Hamas e liberare gli ostaggi. Intanto è scoppiato il caso mediatico sulle parole del segretario generale dell’Onu António Guterres davanti al Consiglio di sicurezza: «È importante riconoscere che gli attacchi di Hamas non sono arrivati dal nulla. Il popolo palestinese è stato sottoposto a 56 anni di occupazione soffocante». Il ministro degli Esteri israeliano Cohen ha chiesto subito le dimissioni. Ma Guterres aveva detto anche che «le proteste del popolo palestinese non possono giustificare gli attacchi di Hamas». E infatti ha ribattuto: «È falso che abbia giustificato i terroristi». Di tutt’altro tenore le dichiarazioni del presidente turco Erdogan su Hamas: «Non sono terroristi ma liberatori che combattono per la loro terra».

Stati Unii, instruttô de l’exerçito o spara in scê gente: 18 mòrti

Ennexima strage ligâ a-e arme da feugo inti Stati Unii. Into Maine un passou instruttô de tio de l’exerçito american o l’à sparou con un scceuppo inte un ristorante e in sce unna festa de zoeni inte un bowling e o l’à ammassou 18 persoñe con ferîne 13, çerte in condiçioin grave. E autoritæ an conseggiou a-i abitanti d’arrestâ in cà e de serrâ e pòrte co-a ciave. O prescidente Joe Biden o l’à domandou torna a-o Congresso d’approvâ a proibiçion pe-e arme d’assato e unna streita in scî contròlli: «O l’é o minimo che poemo fâ pe-i americhen costreiti à vive con di segni fixichi e mentali pe sto neuvo attacco sensa senso». O Robert Card – sto chì o nomme do responsabile – o l’ea introu inte l’exerçito do 2002, ma o l’à comensou à avei di problemi de testa che no l’é guæi e a stæ passâ o l’é stæto recoverou inte un çentro speçailizzou.

Traduçion italiaña

Stati Uniti, istruttore dell’esercito spara sulla folla: 18 morti

Ennesima strage legata alle armi da fuoco negli Stati Uniti. Nel Maine un ex istruttore di tiro dell’esercito americano ha sparato con un fucile in un ristorante e su una festa di ragazzi in un bowling e ha ucciso 18 persone ferendone 13, alcune in gravi condizioni. Le autorità hanno invitato gli abitanti a restare in casa e chiudere le porte a chiave. Il presidente Joe Biden ha chiesto di nuovo al Congresso di approvare il divieto per le armi d’assalto e una stretta sui controlli: «È il minimo che possiamo fare per gli americani costretti a vivere con cicatrici fisiche e mentali per questo nuovo attacco senza senso». Robert Card – questo il nome del responsabile – era entrato nell’esercito nel 2022, ma di recente ha iniziato ad avere problemi mentali e l’estate scorsa è stato ricoverato in un centro specializzato.

O 45% di africhen in Euröpa vittima de razziximo e discriminaçion

Squæxi a meitæ de persoñe d’origine africaña in Euröpa a l’é vittima de razziximo e discriminaçion inta vitta de tutti i giorni. L’é quello che vëgne feua da unn’investigaçion de l’Agençia de l’Union Europea pe-i driti fondamentali: o 45% di intervistæ o dixe d’ëse stæto discriminou pe-a razza inti çinque anni avanti. Do 2016 sta fraçion a l’ea 36%. Into menuo, l’Italia a tocca o 44%, ma in Austria e Germania o dæto o passa o 70%. O 34% o s’é sentio discriminou inta çerchia do travaggio, o 31% in sciô travaggio. O 30% o dixe d’avei patio di asciddi pe caxon da razza, ma squæxi nisciun va à denonçiâli.

Traduçion italiaña

Il 45% degli africani in Europa vittima di razzismo e discriminazione

Quasi la metà delle persone di origine africana in Europa è vittima di razzismo e discriminazione nella vita quotidiana. È quello che emerge da un’indagine dell’Agenzia dell’Unione Europea per i diritti fondamentali: il 45% degli intervistati dice di essere stato discriminato per la razza nei cinque anni precedenti. Nel 2016 questa quota era del 36%. Nel dettaglio, l’Italia tocca il 44%, ma in Austria e Germania il dato supera il 70%. Il 34% si è sentito discriminato nella ricerca del lavoro, il 31% sul lavoro. Il 30% dice di aver subito molestie a causa della razza, ma quasi nessuno va a denunciarle.