O Zinâ

Ediçion

E notiçie da-a Liguria

Senti a verscion registrâ:

Emergensa migranti, arrivi e polemiche à Zena. A Liguria a l’ospitià un Cpr

L’emergensa migranti a tia dentro a Liguria ascì. A Prefettua de Zena a l’à allestio un çentro de primmo reçevimento con de­ tende à Otri, into vegio cantê Costagua, donde l’é stæto assegnou unna çinquanteña de persoñe ascistie da-a Croxe Gianca. À Rieu un campo pe-i minoî no accompagnæ o l’é stæto misso sciù con di container. O scindico Marco Bucci o l’à respòsto a-e polemiche: «Son di appartamenti piccin, se ghe sta i operäi peuan stâghe anche loiatri». O prescidente da Region Giovanni Toti o l’à averto a-a poscibilitæ de mette un çentro pe-i rimpatri in Liguria: «Emmo za dæto a disponibilitæ – o l’à dito –. Che ciaschedun fasse o seu sensa polemiche». E coscì o ministro Piantedosi o l’à annonçiou l’instituçion de un Cpr à Ventemiggia, comm’o l’aiva domandou o scindico Flavio Di Muro. Intanto, pròpio a-o confin co-a Liguria, a Fransa a l’à mobilitou di mezzi particolæ pe no fâ intrâ di migranti.

Traduçion italiaña

Emergenza migranti, arrivi e polemiche a Genova. La Liguria ospiterà un Cpr

L’emergenza migranti coinvolge anche la Liguria. La Prefettura di Genova ha allestito un centro di prima accoglienza con alcune tende a Voltri, nell’ex cantiere Costaguta, dove sono state assegnate una cinquantina di persone assiste dalla Croce Bianca. A Rivarolo un campo per i minori non accompagnati è stato creato con dei container. Il sindaco Marco Bucci ha risposto alle polemiche: «Sono appartamentini, se ci vivono gli operai possono viverci anche loro». Il presidente della Regione Giovanni Toti ha aperto alla possibilità di collocare un centro per i rimpatri in Liguria: «Abbiamo già dato la disponibilità – ha detto –. Ognuno faccia il suo senza polemiche». E così il ministro Piantedosi ha annunciato l’istituzione di un Cpr a Ventimiglia, come aveva chiesto il sindaco Flavio Di Muro. Intanto, proprio al confine con la Liguria, la Francia ha mobilitato mezzi speciali per non far entrare migranti.

A Meloni a-o Salon Nautico de Zena, accòrdio pe 265 mioin de fondi europëi

A prescidente do Conseggio Giorgia Meloni a l’à vixitou o Salon Nautico de Zena, averto da-i 21 a-i 26 de settembre pe-a prima vòtta inti neuvi canæ do Waterfront de Levante. L’ea da 37 anni che un primmo ministro italian o no l’ea presente à l’evento comme instituçion. A Meloni a l’é arrivâ into doppodisnâ di 22 de settembre e, dòppo un gio a-a spedia tra e banchiñe, a l’à firmou un accòrdio co-a Region pe l’addeuvio de 265 mioin de fondi europëi. «O l’é o primmo exempio de unna neuva saxon da capaçitæ ch’avià l’Italia de spende – a l’à dito a prescidente –. Voemo contâ a-o mondo che semmo i ciù bravi». Squæxi 30 mioin servian pe-o scormatô do Besagno, di atri dinæ saian destinæ a-a requalificaçion de case popolare e à unna venteña de stradde provinsale.

Traduçion italiaña

Meloni al Salone Nautico di Genova, accordo per 265 milioni di fondi europei

La presidente del Consiglio Giorgia Meloni ha visitato il Salone Nautico di Genova, aperto dal 21 al 26 settembre per la prima volta nei nuovi canali del Waterfront di Levante. Erano 37 anni che un primo ministro italiano non era presente all’evento in veste istituzionale. Meloni è arrivata nel pomeriggio del 22 settembre e, dopo un giro rapido tra le banchine, ha firmato un accordo con la Regione per l’utilizzo di 265 milioni di fondi europei. «È il primo esempio di una nuova stagione della capacità che avrà l’Italia di spendere – ha detto la presidente –. Vogliamo raccontare al mondo che siamo i più bravi». Quasi 30 milioni serviranno per lo scolmatore del Bisagno, altri soldi saranno destinati alla riqualificazione delle case popolari e a una ventina di strade provinciali.

Tunnel sotta o pòrto, à novembre comensa i travaggi. Tempi ciù longhi pe-a Gronda

Comensià à novembre o primmo lòtto di travaggi pe-o tunnel sotta o pòrto de Zena, con l’intençion d’arrivâ a-a fin à zugno do 2029. Son i tempi previsti da-a soçietæ Autostrade, vegnui feua da un incontro in prefettua co-o ministro de Infrastruttue Matteo Salvini. Va avanti anche o cammin da Gronda: a-a meitæ do 2024 saià compio l’aggiornamento do progetto ch’o dovià passâ a-o ministëio pe l’urtima firma, da lì à no guæi se porrià partî co-i loei ciù importanti che duian pe dex’anni. Pe tutti doî i travaggi s’é za inandiou e attivitæ preliminare. «Inderê no se torna – o l’à commentou o Salvini –. Da tutte e parte gh’é di comitati do ­_no_, chì a Zena o scì o l’é dovuo». Pe-o tunnel da Fontañaboña se conferma a partensa di cantê inta primmaveia do 2024. Pe-i loei inte gallerie in sciâ ræ ligure ghe saià ancon ben ben da patî: a-a giornâ d’ancheu solo 36% di chilòmetri interessæ son stæti missi in seguessa.

Traduçion italiaña

Tunnel subportuale, a novembre iniziano i lavori. Tempi più lunghi per la Gronda

Inizierà a novembre il primo lotto dei lavori per il tunnel subportuale di Genova, con l’obiettivo di terminare a giugno 2029. Sono i tempi previsti dalla società Autostrade, emersi da un incontro in prefettura col ministro delle Infrastrutture Matteo Salvini. Prosegue anche il cammino della Gronda: a metà del 2024 sarà completato l’aggiornamento del progetto che dovrà passare al ministero per l’ultima firma, poco dopo si potrà partire coi lavori più importanti che dureranno dieci anni. Per entrambe le opere sono già state avviate le attività preliminari. «Indietro non si torna – ha commentato Salvini –. Ovunque ci sono comitati del no, qui a Genova il sì è dovuto». Per il tunnel della Fontanabuona si conferma la partenza dei cantieri nella primavera del 2024. Per i lavori nelle gallerie sulla rete ligure ci sarà ancora molto da soffrire: ad oggi solo il 36% dei chilometri interessati sono stati messi in sicurezza.

E notiçie da l’Italia

Senti a verscion registrâ:

Migranti, a streita do Governo. O Mattarella: «E regole de Dublin son preistöia».

Neuvi çentri pe-o rimpatrio donde i migranti se porrian trattegnî pe 18 meixi. O Governo italian o responde coscì à l’ondâ d’arrivi à Lampedusa donde a prescidente da Commiscion Europea von der Leyen, ciammâ da-a Meloni, a l’à presentou un cian con dexe ponti tra-i quæ ascì miscioin navale e corridoî umanitäi: «Saiemo noiatri a deçidde chi intra in Euröpa e no i traffeganti», a l’à dito. In scî Cpr s’açende a polemica co-i prescidenti de Regioin che î conscideran comme de prexoin. O prescidente da Repubrica Sergio Mattarella à Siracusa o l’avverte: «E regole do trattou de Dublin son preistöia, o l’ea un atro mondo sensa unna migraçion de massa, serve de soluçioin coraggiose». Intanto da-a Germania arriva di neuvi finançiamenti de çentanæa de miggiæa d’euro pe-e Ong pe-o sarvamento di migranti in mâ e l’ascistensa à tæra.

Traduçion italiaña

Migranti, la stretta del Governo. Mattarella: «Le regole di Dublino sono preistoria».

Nuovi centri per il rimpatrio dove i migranti si potranno trattenere per 18 mesi. Il Governo italiano risponde così all’ondata di arrivi a Lampedusa dove la presidente della Commissione Europea von der Leyen, chiamata da Meloni, ha presentato un piano con dieci punti tra cui anche missioni navali e corridoi umanitari: «Saremo noi a decidere chi entra in Europa e non i trafficanti», ha detto. Sui Cpr si accende la polemica coi presidenti delle Regioni che le considerano al pari di carceri. Il presidente della Repubblica Sergio Mattarella a Siracusa avverte: «Le regole del trattato di Dublino sono preistoria, era un altro mondo senza una migrazione di massa, servono soluzioni coraggiose». Intanto dalla Germania arrivano nuovi finanziamenti di centinaia di migliaia di euro per le Ong per il salvataggio dei migranti in mare e l’assistenza a terra.

Neuvo còdiçe da stradda, retio da patente pe chi deuvia o telefonin

O Conseggio di ministri o l’à approvou o neuvo còdiçe da stradda ch’o comensià da chì à pöco o seu cammin in Parlamento. Costià ben ben ciù cao addeuviâ o telefonin a-o volante: fin à 1.697 euro de bolletta, doî meixi sensa patente e taggio de 10 ponti za a-a primma violaçion. Nisciuña tolleransa pe chi guidda imbriægo ò drogou: saià proibio beive di alcòlichi apreuvo à de condanne pe di reati particolæ con l’òbrigo d’installâ un alcolock, un appægio ch’o l’impedisce a-o motô d’açendise se o tascio alcolemico o l’é ciù che zero. A-i patentæ de fresco niente machine de gròssa potensa pe 3 anni. In scî monopattini elettrichi besorià aveighe o casco, a targa e l’asseguaçion. Pe-i autovelox arriva unna definiçion ciù streita in scê speçifiche tecniche e in sciô poxiçionamento.

Traduçion italiaña

Nuovo codice della strada, ritiro della patente per chi usa il cellulare

Il Consiglio dei ministri ha approvato il nuovo codice della strada che inizierà a breve il suo cammino in Parlamento. Costerà molto più caro usare il cellulare al volante: fino a 1.697 euro di multa, due mesi senza patente e tagli di 10 punti già alla prima violazione. Tolleranza zero per chi guida ubriaco o drogato: sarà vietato bere alcolici in seguito a condanne per reati specifici con l’obbligo di installare un alcoloc, un dispositivo che impedisce al motore di accendersi se il tasso alcolemico è superiore a zero. Ai neopatentati niente auto di grossa cilindrata per 3 anni. Sui monopattini elettrici bisognerà avere il casco, la targa e l’assicurazione. Per gli autovelox arriva una definizione più stringente sulle specifiche tecniche e sul posizionamento.

O fa mostra d’ësise ammassou ma o scappa in Greçia: trovou dòppo dex’anni

«Ciao moæ, ciao poæ, l’é arrivou o momento de fâla finia. Çerchiò d’avansâve a-o manco o dô do morteuio». L’ea i 7 de luggio do 2013 quande o Adamo, poæ de doe figge e stæto sposou co-a Raffaella, o sparisce da Imola. Tutto o fa pensâ ch’o se segge ammassou, ma a dònna a no se rende e a se mette à çercâlo. Da lì à pöchi giorni, a-i 16 de luggio, a machina do Adamo a vëgne trovâ à Ancoña e se descreuve ch’o l’à piggiou un barco pe Patrasso, in Greçia. Pâ poscibile ch’o se segge cacciou in mâ. Do 2015 a Procua de Bològna a l’archivia o caxo. E dòppo sett’anni, into mezo de pratiche pe-o divòrçio, o corpo de scena: l’òmmo o l’é vivo e o l’à domandou d’inscrivise à l’anagrafe di italien rescidenti à l’estranxeo. À trovâlo gh’à pensou a trasmiscion Chi l’ha visto? ch’o l’à trovou vivo e in boña sanitæ. «Pe mi o no l’é uman, o no l’é un òmmo, o no l’é un poæ», e poule amae da moæ de seu figge.

Traduçion italiaña

Finge di essersi ucciso ma scappa in Grecia: trovato dopo dieci anni

«Ciao mamma, ciao papà, è arrivato il momento di farla finita. Cercherò di evitarvi almeno il dolore del funerale». Era il 7 luglio 2013 quando Adamo, padre di due figlie e un tempo sposato con Rafaella, sparisce da Imola. Tutto fa pensare che si sia ucciso, ma la donna non si arrende e si mette a cercarlo. Dopo pochi giorni, il 16 luglio, la macchina di Adamo viene trovata ad Ancona e si scopre che ha preso un traghetto per Patrasso, in Grecia. Sembra possibile che si sia buttato in mare. Nel 2015 la Procura di Bologna archivia il caso. E dopo sette anni, nel mezzo delle pratiche per il divorzio, il colpo di scena: l’uomo è vivo e ha chiesto di iscriversi all’anagrafe degli italiani residenti all’estero. A trovarlo ci ha pensato la trasmissione Chi l’ha visto? che lo ha trovato vivo e in buona salute. «Per me non è umano, non è un uomo, non è un padre», le parole amare della madre delle sue figlie.

E notiçie da-o mondo

Senti a verscion registrâ:

Ucraina e Ruscia insemme à l’Onu, o Zelensky o ciamma ciù aggiutti a-i Stati Unii

O prescidente ucraino Volodymyr Zelensky e o ministro ruscio Sergej Lavrov inta mæxima salla à Neuva York pe parteçipâ a-a sescion particolâ de Naçioin Unie dedicâ a-a guæra. «A presensa da Ruscia a l’é inlegitima e o poei de veto in man à l’aggressô o l’é quello ch’o l’à misso l’Onu inte sta scituaçion de blòcco», o l’à dito o Zelensky. O segretäio generale Guterres o l’à domandou de fermâ i attacchi in sciâ popolaçion. Dapeu o Zelensky o l’à parlou a-i senatoî americhen: «Sensa aggiutti perdiemo a guæra». Ma i repubrichen l’an ziou: «Gh’emmo da pensâ a-i nòstri problemi». O departimento di Stato american o l’à annonçiou un neuvo pacchetto d’arme à l’Ucraina pe 325 mioin de dòllari.

Traduçion italiaña

Ucraina e Russia insieme all’Onu, Zelensky chiede più aiuti agli Stati Uniti

Il presidente ucraino Volodymyr Zelensky e il ministro russo Sergej Lavrov nella stessa sala a New York per partecipare alla sessione particolare delle Nazioni Unite dedicata alla guerra. «La presenza della Russia è illegittima e il potere di veto in mano all’aggressore è quello che ha messo l’Onu in questa situazione di blocco», ha detto Zelensky. Il segretario generale Guterres ha chiesto di fermare gli attacchi sulla popolazione. Poi Zelensky ha parlato ai senatori americani: «Senza aiuti perderemo la guerra». Ma i repubblicani lo hanno gelato: «Dobbiamo pensare ai nostri problemi». Il dipartimento di Stato americano ha annunciato un nuovo pacchetto di armi all’Ucraina per 325 milioni di dollari.

Nagorno-Karabakh sensa paxe, neuva operaçion militare de l’Azerbaigian

Torna guæra into Nagorno-Karabakh, region conteisa tra l’Armenia e l’Azerbaigian donde a passâ repubrica sovietica a l’à inandiou unna neuva operaçion militare. Dòppo 24 oe l’é arrivou o fermæ o feugo, ma se parla za de 200 mòrti, tra-i quæ unna dëxeña de çivili e 5 figgeu, e 400 ferii. A region, donde i ciù tanti son i armen, a l’é sotta o contròllo di azeri comme stabilio do 2020, ma a zöna de Stepanokret a l’é parte de l’enclave separatista de l’Artsakh, unna repubrica proclamâ da lê e no reconosciua da-a communitæ internaçionale. L’Armenia a l’à denonçiou a-e Naçioin Unie che l’Azerbaigian o l’é apreuvo à fâ da «nettixe etnica» e un «crimine contra l’umanitæ».

Traduçion italiaña

Nagorno-Karabakh senza pace, nuova operazione militare dell’Azerbaigian

Ancora guerra nel Nagorno-Karabakh, regione contesa tra l’Armenia e l’Azerbaigian dove l’ex repubblica sovietica ha avviato una nuova operazione militare. Dopo 24 ore è arrivato il cessate il fuoco, ma si parla già di 200 morti, tra cui una decina di civili e 5 bambini, e 400 feriti. La regione, dove la maggior parte sono armeni, è sotto il controllo degli azeri come stabilito nel 2020, ma la zona di Stepanokret è parte dell’enclave separatista dell’Artsakh, una repubblica autoproclamata e non riconosciuta dalla comunità internazionale. L’Armenia ha denunciato alle Nazioni Unite che l’Azerbaigian sta facendo una «pulizia etnica» e un «crimine contro l’umanità».

Gran Bretagna e Fransa, co-o Carlo III torna amighe dòppo a Brexit

O re d’Inghiltæra Carlo III co-a Camilla son anæti in vixita pe trei giorni à Pariggi con l’intençion de çelebrâ a neuva amixiçia co-a Fransa dòppo e tenscioin ligæ a-a Brexit. O prescidente Macron co-a première dame Brigitte son defilæ co-i regnanti in scî Champs-Elysées. O Carlo, parlando davanti a-o Senato franseise, o s’é impegnou à fâ tutto o poscibile pe «rinforsâ o rappòrto neçessäio tra a Gran Bretagna e a Fransa». E o l’à azzonto, in franseise: «O Regno Unio o saià de longo un di amixi ciù vexin a-a Fransa e insemme o nòstro potençiale o no gh’à de limiti».

Traduçion italiaña

Gran Bretagna e Francia, con Carlo III di nuovo amiche dopo la Brexit

Il re d’Inghilterra Carlo III e Camilla sono andati in visita per tre giorni a Parigi con l’intenzione di celebrare la nuova amicizia con la Francia dopo le tensioni legate alla Brexit. Il presidente Macron e la première dame Brigitte hanno sfilato coi regali sugli Champs-Elysées. Carlo, parlando davanti al Senato francese, si è impegnato a fare tutto il possibile per «rafforzare il rapporto indispensabile tra la Gran Bretagna e la Francia». E ha aggiunto, in francese: «Il Regno Unito sarà sempre uno degli amici più vicini alla Francia e insieme il nostro potenziale non ha limiti».