O Zinâ

Ediçion

E notiçie da-a Liguria

Senti a verscion registrâ:

Açidente in sciô travaggio in pòrto, graviscimo un operäio de 67 anni

Un operäio de 67 anni o l’é arrestou sotta à un blòcco de ciumento tanto ch’o travaggiava into cantê da ferrovia drento a-o pòrto de Zena a-i 4 de settembre. L’òmmo, ch’o se ciamma Pietro Greco, o l’é stæto portou inconsciente e intubbou a-o San Martin de Zena, dond’o l’é recoverou con un graviscimo trauma a-o cranio in prògnoxi reservâ. I operäi ean apreuvo à mesciâ i blòcchi con un escavatô, un de quelli o s’é arrubattou e o l’à corpio o Greco in sciâ testa tanto ch’o retiava unna ræ. A Procua a l’à averto unn’investigaçion pe lexoin corpose e o l’à indagou o responsabile da seguessa e l’òmmo ch’o manovrava o machinäio. O scito de l’açidente o l’é stæto sexio pe capî areo a dinamica. I scindicati an scrito à l’Autoritæ do pòrto pe ottegnî un accòrdio ch’o l’indiche proçedue, responsabilitæ e contròlli in sce tutti i cantê into pòrto.

Traduçion italiaña

Incidente sul lavoro in porto, gravissimo un operaio di 67 anni

Un operaio di 67 anni è rimasto sotto un blocco di cemento mentre lavorava nel cantiere della ferrovia all’interno del porto di Genova il 4 settembre. L’uomo, che si chiama Pietro Greco, è stato portato incosciente e intubato al San Martino di Genova, dove è ricoverato con un gravissimo trauma cranico in progni riservata. Gli operai stavano movimentando i blocchi con un escavatore, uno di questi si è ribaltato e ha colpito Greco sulla testa mentre spostava una rete. La Procura ha aperto un’inchiesta per lesioni colpose e ha indagato il responsabile della sicurezza e l’uomo che manovrava il macchinario. Il luogo dell’incidente è stato sequestrato per chiarire la dinamica. I sindacati hanno scritto all’Autorità portuale per ottenere un accordo che indichi procedure, responsabilità e controlli su tutti i cantieri in porto.

Regazzificatô, monta a protesta into Savoneise

A l’é sempre ciù pesante l’äia into Ponente dòppo a deçixon de mette un regazzificatô in sce unna nave à 4 chillòmetri da-a riva de Saña e Voæ, con de neuve condute che passian da Cuggen, l’Artâ e Cairi. Tra e tante iniçiative de protesta gh’é unna cadeña umaña in sciâ mæña da Saña à Berzezzi inandiâ pe-i 10 de settembre. A petiçion contra o progetto a l’à passou e 5mia firme. E into fronte do «no», za pin de scindichi e assoçiaçioin de categoria, gh’é ascì l’instituto comprenscivo de Cuggen con unna delibera approvâ à l’unanimitæ da-i professoî. «Unna grave strumentalizzaçion di figgeu pe fâ da propaganda politica», a l’à commentou a Region ciammando l’intervento do ministro de l’Instruçion Valditara. Pe-o prescidente Toti, ch’o l’é anche o commissäio nominou da-o Governo, o regazzificatô o l’é «strategico no solo pe-a Liguria ma pe l’Italia intrega, perché a crixi energetica a no l’é ancon finia. Chi l’é conträio o fa de l’oppoxiçion politica ò o l’à de raxoin ideològiche». De l’argomento s’é parlou anche inte un incontro à Zena co-o ministro de l’Ambiente Pichetto Fratin ch’o l’à previsto un anno pe portâ a-a fin a valutaçion de recheita ambientale.

Traduçion italiaña

Rigassificatore, cresce la protesta nel Savonese

È sempre più pesante l’aria nel Ponente dopo la decisione di collocare un rigassificatore su una nave a 4 chilometri dalla costa di Savona e Vado, con nuove condutture che passeranno da Quiliano, Altare e Cairo Montenotte. Tra le tante iniziative di protesta c’è una catena umana sulla spiaggia da Savona a Bergeggi organizzata per il 10 settembre. La petizione contro il progetto ha superato le 5mila firme. E nel fronte del «no», già pieno di sindaci e associazioni di categoria, c’è anche l’istituto comprensivo di Quiliano con una delibera approvata all’unanimità dai docenti. «Una grave strumentalizzazione dei bambini per fare propaganda politica», ha commentato la Regione invocando l’intervento del ministro dell’Istruzione Valditara. Per il presidente Toti, che è anche il commissario nominato dal Governo, il rigassificatore è «strategico non solo per la Liguria ma per l’Italia intera, perché la crisi energetica non è ancora finita. Chi è contrario fa opposizione politica o ha motivazioni ideologiche». Dell’argomento si è parlato anche in un incontro a Genova col ministro dell’Ambiente Pichetto Fratin che ha previsto un anno per concludere la valutazione di impatto ambientale.

Scceuppo à Soudan, mòrto un di zoeni franseixi

O l’é mòrto o Christophe Perez, un di zoeni franseixi interessæ da-o scceuppo de unna palaçiña à Soudan, inte l’entrotæra d’Impëia, a-i 27 d’agosto. O l’ea stæto portou a-o Çentro de gren bruxeuie de l’uspiâ Villa Scassi de Zena, ma e seu condiçion ean parsciue despiæ da-o primmo momento. O l’aiva 26 anni. Un atro zoeno, o Louis Lesser de 25 anni, o va megio e o l’é stæto stramuou à Marseggia. O terso, o Jonathan Fortunato, figgio do propietäio do scito, o l’é ancon recoverou à Turin. Tutti trei ean lì pe festezzâ un anniversäio. À caxonâ o scceuppo, ch’o l’à fæto deruâ unna parte da palaçiña, l’é stæto unna fuga de gazzo. A Procua d’Impëia a l’indaga pe desastro corposo e lexoin.

Traduçion italiaña

Esplosione a Soldano, morto uno dei giovani francesi

È morto Christophe Perez, uno dei giovani francesi coinvolti nell’esplosione di una palazzina a Soldano, nell’entroterra di Imperia, il 27 agosto. Era stato portato al Centro grandi ustionati dell’ospedale Villa Scassi di Genova, ma le sue condizioni erano parse disperate fin da subito. Aveva 26 anni. Un altro ragazzo, il 25enne Louis Lesser, è in miglioramento ed è stato trasferito a Marsiglia. Il terzo, Jonathan Fortunato, figlio del proprietario dell’appartamento, è ancora ricoverato a Torino. Tutti e tre erano lì per festeggiare un compleanno. A causare l’esplosione, che ha fatto crollare una parte della palazzina, è stata una fuga di gas. La Procura di Imperia indaga per disastro colposo e lesioni.

E notiçie da l’Italia

Senti a verscion registrâ:

O Governo o l’avaa o decreto Caivano, streita in sciâ criminalitæ tra i zoeni

Arresto in flagransa pe-a vendia de dröga in quantitæ picciñe, anche pe-i minoî. Daspo fin a-i 14 anni. Prexon pe chi no manda i figgi a-a scheua. Potestæ levâ a-i genitoî se un zoeno o l’é ligou à un gruppo de mafia. Contròllo obrigatöio in scî telefonin pe limitâ l’intrâ inti sciti de pornografia. Son e mesue ciù importante contegnue into decreto approvou da-o governo Meloni dòppo e violense de gruppo à Caivano. «Semmo i primmi à affrontâ un problema che i atri an sghindou, o Stato o ghe mette o moro perché i problemi se peuan destrigâ», a l’à commentou a prescidente do Conseggio in conferensa stampa. Into provedimento gh’é ascì 30 mioin e un commissäio pe contrastâ a descheita soçiale de quello territöio. «A represcion a no basta, ghe veu ascì da prevençion», dixe e oppoxiçioin.

Traduçion italiaña

Il Governo vara il decreto Caivano, stretta sulla criminalità giovanile

Arresto in flagranza per lo spaccio di droga di lieve entità, anche per i minori. Daspo fino ai 14 anni. Carcere per chi non manda i figli a scuola. Potestà tolta ai genitori se un giovane è legato a un gruppo mafioso. Controllo obbligatorio sui cellulari per limitare l’accesso ai siti pornografici. Sono le misure più rilevanti contenute nel decreto approvato dal governo Meloni dopo le violenze di gruppo a Caivano. «Siamo i primi ad affrontare un problema che gli altri hanno evitato, lo Stato ci mette la faccia perché i problemi si possono risolvere», ha commentato la presidente del Consiglio in conferenza stampa. Nel provvedimento ci sono anche 30 milioni e un commissario per contrastare il degrado sociale di quel territorio. «La repressione non basta, ci vuole anche prevenzione», dicono le opposizioni.

Strage de Brandisso, o tecnico o l’ammette: «Loei comensæ sensa autorizzaçion»

«Se ve diggo treno cacciæve da quella parte». A frase a l’é quella che se sente into video fæto da-o Kevin Laganà, uña de vittime da strage de Brandisso, donde un treno in corsa o l’à misso sotta e ammassou çinque operäi apreuvo à travaggiâ in scê colisse. E à confermâ ch’a l’é anæta pròpio coscì, cianzendo davanti a-i magistrati, l’é stæto o Antonio Massa, a voxe do video, o tecnico de l’Rfi ch’o l’à dæto o permisso de comensâ i loei sciben che pe træ vòtte no gh’an lasciou l’autorizzaçion neçessäia. Pe de ciù, da quello che vëgne feua da l’investigaçion da Procua d’Ivrea, quello de Brandisso o no saieiva l’unico caxo. L’atro indagou o l’é o Andrea Girardin Gibin, o capposquaddra da Sigifer. «Gh’ò a consciensa à pòsto – o l’à dito o Franco Sirianni, baccan da Sigifer –. Pe noiatri a seguessa a l’é delongo stæta a primma cösa».

Traduçion italiaña

Strage di Brandizzo, il tecnico ammette: «Lavori iniziati senza autorizzazione»

«Se vi dico treno buttatevi da quella parte». La frase è quella che si sente nel video realizzato da Kevin Laganà, una delle vittime della strage di Brandizzo, dove un treno in corsa ha travolto e ucciso cinque operai al lavoro sui binari. E a confermare che è andata proprio così, piangendo davanti ai magistrati, è stato Antonio Massa, la voce del video, il tecnico di Rfi che ha dato il permesso di iniziare i lavori nonostante per tre volte non gli avessero rilasciato l’autorizzazione necessaria. Inoltre, da quelle che emerge dall’inchiesta della Procura di Ivrea, quello di Brandizzo non sarebbe l’unico caso. L’altro indagato è Andrea Girardin Gibin, il caposquadra della Sigifer. «Ho la coscienza a posto – ha detto Franco Sirianni, titolare della Sigifer –. Per noi la sicurezza è sempre stata al primo posto».

Ustica, dòppo 43 anni o Giuliano Amato o l’arve torna o caxo

O Giuliano Amato o l’arve torna o caxo da strage d’Ustica. Inte unn’intervista à La Repubblica o passou prescidente do Conseggio o sostëgne che l’airoplano preçipitou a-i 27 de zugno do 1980 o l’é stæto abbattuo da un miscile franseise: «O l’ea un cian pe ammassâ o Gheddafi – o l’à dito o Amato – ma lê o l’é scampou perché avvertio da-o Craxi». Respòsta da Pariggi: «A Fransa a l’à za fornio ògni elemento ma a l’é à dispoxiçion pe louâ con l’Italia s’a ô domandià». Ma percöse parlâ pròpio oua? «À 85 anni ò ciù pöco tempo davanti e sento che in sce Ustica gh’é quarcösa ancon da compî», o l’à dito o Amato.

Traduçion italiaña

Ustica, dopo 43 anni Giuliano Amato riapre il caso

Giuliano Amato riapre il caso della strage di Ustica. In un’intervista a La Repubblica l’ex presidente del Consiglio sostiene che l’aereo precipitato il 27 giugno 1980 è stato abbattuto da un missile francese: «Era un piano per ammazzare Gheddafi – ha detto Amato – ma lui è sopravvissuto perché avvertito da Craxi». Replica di Parigi: «La Francia ha già fornito ogni elemento ma è a disposizione per lavorare con l’Italia se lo chiederà». Ma per quale motivo parlare proprio adesso? «A 85 anni ho poco tempo davanti e sento che su Ustica c’è ancora qualcosa di incompiuto», ha detto Amato.

E notiçie da-o mondo

Senti a verscion registrâ:

Guæra in Ucraina, i Stati Unii mandan e muniçion à l’uranio pöveo

I Stati Unii mandian pe-a prima vòtta à l’Ucraina e muniçioin à l’uranio pöveo, fin à oua mandæ solo da Londra. L’ambasciâ ruscia a l’à definio «desumaña» a deçixon de Washington. Unna «notiçia bruttiscima» pe-o portavoxe do Cremlin, Dmitrij Peskov. Intanto di tòcchi de un dron ruscio son cheiti in sciô territöio da Romania ch’a l’à parlou de unna «grave violaçion da sovranitæ de un Paise Nato», se fïse confermou donde ne vegnivan. A fondaçion Nobel, apreuvo a-e proteste, a l’à retiou l’invito a-i ambascioei ruscio, iranian e bieloruscio pe-a çeimònia da premiaçion, con reçeive coscì l’approvaçion de Kiev.

Traduçion italiaña

Guerra in Ucraina, gli Stati Uniti inviano le munizioni all’uranio impoverito

Gli Stati Uniti manderanno per la prima volta all’Ucraina le munizioni all’uranio impoverito, finora mandate solo da Londra. L’ambasciata russa ha definito «disumana» la decisione di Washington. Una «notizia bruttissima» per il portavoce del Cremlino, Dmitrij Peskov. Intanto frammenti di un drone russo sono caduti sul territorio della Romania che ha parlato di una «grave violazione della sovranità di un Paese Nato», se fosse confermata la provenienza. La fondazione Nobel, dopo le proteste, ha ritirato l’invito agli ambasciatori russo, iraniano e bielorusso per la cerimonia di premiazione, ricevendo così l’approvazione di Kiev.

Tempesta in Greçia: inondaçioin, mòrti e despersci

Unna fòrte tempesta a l’à corpio a Greçia da-i 5 de settembre. Inte çerti pòsti l’é cheito squæxi mille millimetri d’ægua, quella ch’a dovieiva cazze inte un anno intrego. A scituaçion ciù critica a Larissa, uña de ciù gren çittæ, donde o sciumme Pineios o l’é anæto de sorvia. O primmo conto o l’é de 10 mòrti e 4 despersci, ma se pensa che çentanæa de persoñe seggian ancon imprexonæ inti paixi ciù piccin donde no se peu arrivâ pe caxon di allagamenti e de frañe. I abitanti son stæti portæ via con de barche e di elicòtteri, 270 solo inte urtime oe. «Faiemo tutto quello che serve – o l’à deciarou o primmo ministro Kyriakos Mitsotakis –. Mettiemo à mezo anche tutte e risòrse europee che gh’é, primma de tutto pe-e famigge».

Traduçion italiaña

Tempesta in Grecia: inondazioni, morti e dispersi

Una forte tempesta ha colpito la Grecia dal 5 settembre. In alcune località sono caduti quasi mille millimetri di pioggia, quella che dovrebbe cadere in un anno intero. La situazione più critica a Larissa, una delle maggiori città, dove il fiume Pineios è esondato. Il primo bilancio è di 10 morti e 4 dispersi, ma si ritiene che centinaia di persone siano ancora intrappolate nei paesi più piccoli dove non si può arrivare a causa degli allagamenti e delle frane. Gli abitanti sono stati evacuati con barche ed elicotteri, 270 solo nelle ultime ore. «Faremo tutto quello che serve – ha dichiarato il primo ministro Kyriakos Mitsotakis –. Mobiliteremo anche tutte le risorse europee disponibili, anzitutto per le famiglie».

Clima, l’Ue: «A stæ do 2023 a ciù cada mai registrâ in sciâ Tæra»

A stæ passâ a l’é stæta a ciù cada mai registrâ a livello globale, segondo o serviçio meteorologico de l’Union Europea Copernicus. À zugno, luggio e agosto do 2023 a temperatua media in sciâ Tæra a l’é stæta de 16,77 graddi, saieiva à dî 0,66 graddi sorvia a media. In particolâ o meise d’agosto o l’é stæto o ciù cado de tutti i atri meixi, levou o luggio do 2022. Se stimma che a temperatua a segge stæta de un graddo e mezo ciù erta da media pre-industriale tra o 1850 e o 1900. L’allarme o l’à da fâ co-o mâ ascì: ògni giorno da-i 31 de luggio a-i 31 d’agosto passæ e temperatue in çimma de l’ægua an passou l’urtimo record do marso do 2016. A media do meise a l’é stæta de 20,98 graddi, con unn’anomalia de 0,55 graddi.

Traduçion italiaña

Clima, l’Ue: «L’estate 2023 la più calda mai registrata sulla Terra»

L’estate scorsa è stata la più calda mai registrata a livello globale, secondo il servizio meteorologico dell’Unione Europea Copernicus. A giugno, luglio e agosto 2023 la temperatura media sulla Terra è stata di 16,77 gradi, cioè 0,66 gradi sopra la media. In particolare il mese di agosto è stato il più caldo di tutti gli altri mesi, tolto luglio 2022. Si stima che la temperatura sia stata di un grado e mezzo più alta della media pre-industriale tra il 1850 e il 1900. L’allarme riguarda anche il mare: ogni giorno dal 31 luglio al 31 agosto scorsi le temperature superficiali dell’acqua hanno superato l’ultimo record di marzo 2016. La media del mese è stata di 20,98 graddi, con un’anomalia di 0,55 gradi.