O Zinâ

Ediçion

E notiçie da-a Liguria

Senti a verscion registrâ:

Deruo d’ægua in sce Zena, allagamenti e danni

Un deruo d’ægua o l’à investio Zena inta neutte tra i 28 e i 29 d’agosto con caxonâ di allagamenti e di danni in gio pe-a çittæ. In sce tutta a Liguria gh’ea l’allerta cô de çetron. I problemi ciù gròsci à San Fruttoso e in Sozzeia, donde e stradde son vegnue di sciummi e l’ægua a l’à invaso e buteghe. I pompê an sarvou de persoñe imprexonæ inti sottopasci e inti ascensoî di palaçi. À l’uspiâ pediatrico Gaslini un erbo o l’é cheito in scî tubbi de l’oscigeno e o pronto soccorso o l’é stæto desbarassou. O Commun o l’é stæto accaxonou de no avei nettezzou i coniggi, ma o scindico Marco Bucci o l’à rebattuo: «Son stæti attappæ apòsta, a çittæ a l’à reagio ben, gh’é da ëse contenti». In sce Zena l’é cheito 230 millimetri d’ægua inte un giorno. O Besagno, da secco ch’o l’ea, o l’é arrivou a-o primmo livello de guardia. «S’existesse unn’allerta rossa pe-e borrasche l’aviëscimo dæta – o l’à azzonto o Toti – ma o conto di guasti à l’uso o l’é pöca röba».

Traduçion italiaña

Nubifragio su Genova, allagamenti e danni

Un nubifragio ha investito Genova nella notte tra il 28 e il 29 agosto provocando allagamenti e danni in giro per la città. Su tutta la Liguria c’era l’allerta arancione. I problemi più grossi a San Fruttuoso e in Soziglia, dove le strade sono diventate fiumi e l’acqua ha invaso i negozi. I vigili del fuoco hanno salvato persone intrappolate nei sottopassi e negli ascensori dei palazzi. All’ospedale pediatrico Gaslini un albero è caduto sui tubi dell’ossigeno e il pronto soccorso è stato sgomberato. Il Comune è stato accusato di non aver pulito le caditoie, ma il sindaco Marco Bucci ha replicato: «Sono stati tappati apposta, la città ha reagito bene, dobbiamo essere contenti». Su Genova sono caduti 230 millimetri di pioggia in un giorno. Il Bisagno, da secco quale era, è arrivato al primo livello di guardia. «Se esistesse un’allerta rossa per i temporali l’avremmo data – ha aggiunto Toti – ma il bilancio dei danni in fin dei conti è lieve».

Depòxiti chimichi da Mortiou à San Pê d’Æña, neuvi scheuggi pe-o progetto

Neuvo sappello pe-o progetto de stramuo di depòxiti chimichi da Mortiou à Ponte Somalia into pòrto de San Pê d’Æña. O ministëio de l’Ambiente o l’à revendicou a competensa in sciâ valutaçion de recheita ambientale, un fæto ch’o porrieiva allonghî ben ben i tempi da pratica. «Paghemmo o presumî do Toti e do Bucci», attacca l’oppoxiçion. «No l’é vea che dovemmo partî torna da-o comenso, chi ne mettià i bacchi inte reue ne respondià davanti a-a seu consciensa e a-i seu elettoî», o l’à commentou o scindico. Ma gh’é un atro scheuggio da affrontâ: o Comitato tecnico regionale o l’à cacciou inderê o progetto pe de mancanse in ponto seguessa. Oua a Superba, l’açienda ch’a s’à intestou a pratica, a dovià presentâ de integraçioin. «No gh’é nisciun pai negativo e nisciuña bocciatua, se va avanti inta giusta mainea», o l’à respòsto o prescidente da Region. E à propòxito de gren travaggi, a Procua de Zena a l’indaga in sciâ neuva diga do pòrto dòppo l’espòsto do passou procuou da Corte di conti Ermete Bogetti. E ipòtexi de reato son de turbamento de cæga pubrica e abuso d’offiçio.

Traduçion italiaña

Depositi chimici da Multedo a Sampierdarena, nuovi intoppi per il progetto

Nuovo ostacolo per il progetto di trasferimento dei depositi chimici da Multedo a Ponte Somalia nel porto di Sampierdarena. Il ministero dell’Ambiente ha rivendicato la competenza sulla valutazione di impatto ambientale, un fatto che potrebbe allungare di molto i tempi della pratica. «Paghiamo l’arroganza di Toti e Bucci», attacca l’opposizione. «Non è vero che dobbiamo ripartire dall’inizio, chi ci metterà i bastoni tra le ruote ne risponderà davanti alla sua coscienza e ai suoi elettori», ha commentato il sindaco. Ma c’è un altro scoglio da affrontare: il Comitato tecnico regionale ha respinto il progetto per mancanze in materia di sicurezza. Ora Superba, l’azienda che si è intestata la pratica, dovrà presentare delle integrazioni. «Non c’è nessun parere negativo e nessuna bocciatura, si va avanti correttamente», ha risposto il presidente della Regione. E a proposito di grandi opere, la Procura di Genova indaga sulla nuova diga del porto dopo l’esposto dell’ex procuratore della Corte dei conti Ermete Bogetti. Le ipotesi di reato sono di turbativa d’asta e abuso d’ufficio.

Scceuppo inte unna palaçiña à Soudan, graviscimi doî zoeni

Unna palaçiña a l’é vegnua zu à Soudan, inta provinsa d’Impëia, pe-o scceuppo de unna bomboa de gazzo. O l’é avvegnuo inta mattinâ di 27 d’agosto. De drento gh’ea trei zoeni franseixi vegnui à festezzâ un anniversäio. Doî de loiatri, de 25 e 26 anni, son stæti portæ à l’uspiâ Villa Scassi de Zena in condiçioin pesantiscime: son in còmma farmacològico con de bruxeuie in sciô 90% do còrpo. O terso, de 37 anni, figgio do propietäio do scito, o l’ea arrestou sotta o zetto: stæto tiou feua da-i pompê, oua o sta ciù ben e o l’é recoverou à Turin. A Procua a l’à averto unn’investigaçion pe desastro corposo e lexoin coscì da attrovâ se gh’é di responsabili. A cà donde gh’é stæto o scceuppo a dovià ëse cacciâ zu.

Traduçion italiaña

Esplosione in una palazzina a Soldano, gravissimi due giovani

Una palazzina è crollata a Soldano, nella provincia d’Imperia, per l’esplosione di una bombola di gas. È successo nella mattinata del 27 agosto. All’interno c’erano tre giovani francesi venuti a festeggiare un anniversario. Due di loro, di 25 e 26 anni, sono stati portati all’ospedale Villa Scassi di Genova in condizioni gravissime: sono in coma farmacologico con ustioni sul 90% del corpo. Il terzo, 37enne, figlio del proprietario dell’appartamento, era rimasto sotto le macerie: estratto dai vigili del fuoco, ora sta meglio ed è ricoverato a Torino. La Procura ha aperto un’inchiesta per disastro colposo e lesioni in modo da trovare eventuali responsabili. La casa dove è avvenuta l’esplosione dovrà essere demolita.

E notiçie da l’Italia

Senti a verscion registrâ:

Un treno o l’investe un cantê: 5 operäi mòrti in Piemonte

Çinque operäi son stæti missi sotta e ammassæ da un treno in corsa à 160 chillòmetri à l’oa à Brandisso, in sciâ linia Milan-Turin, tanto che travaggiavan pe cangiâ de colisse inta neutte tra i 30 e i 31 d’agosto. Gh’aivan da-i 22 a-i 52 anni, louavan tutti pe-a Sigifer de Verçelli e son mòrti in sciô momento pe-a violensa da bòtta. Atri doî louanti se son sarvæ. A Procua d’Ivrea a l’à averto unn’investigaçion pe desastro ferroviäio corposo e ammassamento corposo plurimo, da-a quæ vëgne za feua «de grave violaçioin de proçedue de seguessa». Segondo e Ferrovie do Stato «i travaggi avieivan dovuo comensâ solo dòppo o passaggio do treno». O prescidente da Repubrica Sergio Mattarella o l’é anæto into scito da tragedia e o l’à depòsto unna coroña de scioî: «Moî in sciô travaggio a l’é unn’offeisa a-i valoî da convivensa», o l’à dito. O ministro di Traspòrti Matteo Salvini o l’à annonçiou unna commiscion interna pe capî cöse no l’agge fonçionou. O segrettäio da Cgil Maurizio Landini o l’à deciarou un sciòpero de 4 oe: «Sta strage – o l’à commentou – a va fermâ de ficco».

Traduçion italiaña

Treno investe cantiere: 5 operai morti in Piemonte

Cinque operai sono stati travolti e uccisi da un treno in corsa a 160 chilometri orari a Brandizzo, sulla linea Milano-Torino, mentre lavoravano per sostituire delle rotaie nella notte tra il 30 e il 31 agosto. Avevano dai 22 ai 52 anni, lavoravano tutti per la Sigifer di Vercelli e sono morti sul colpo per la violenza dell’impatto. Altri due lavoratori si sono salvati. La Procura di Ivrea ha aperto un’inchiesta per disastro ferroviario colposo e omicidio colposo plurimo, da cui emergono già «gravi violazioni delle procedure di sicurezza». Secondo le Ferrovie dello Stato «i lavori avrebbero dovuto iniziare solo dopo il passaggio del treno». Il presidente della Repubblica Sergio Mattarella è andato sul luogo della tragedia e ha deposto una corona di fiori: «Morire sul lavoro è un’offesa ai valori della convivenza», ha detto. Il ministro dei Trasporti Matteo Salvini ha annunciato una commissione interna per capire che cosa non abbia funzionato. Il segretario della Cgil Maurizio Landini ha proclamato uno sciopero di 4 ore: «Questa strage – ha commentato – va fermata immediatamente».

Violense de gruppo, a Meloni à Caivano: «Chì o Stato o l’à fallio»

A prescidente do Conseggio Giorgia Meloni a l’é anæta à Caivano, vexin à Napoli, apreuvo a-o caxo de violense de gruppo in sce doe figgette de 10 e 12 anni. À invitâla l’ea stæto o parreco, præ Maurizio Patriciello. «Chì o Stato o l’à fallio, travaggemmo pe unna bonifica radicale a-a spedia – a l’à dito dòppo ch’a l’à incontrou –. Semmo chì pe mettighe o moro e pe manifestâ da solidarietæ à de vittime che no an fæto ninte». A Meloni a l’ea stæta menassâ avanti da vixita, ma no gh’é stæto de vee proteste a-o seu arrivo: quarchedun l’à avvoxâ, atri gh’an cioccou e moen e no l’é mancou quarche scigoo de contestaçion. De menasse son stæte denonçiæ ascì da-a moæ de unna figgia ch’à l’à patio i abuxi.

Traduçion italiaña

Violenze di gruppo, Meloni a Caivano: «Qui lo Stato ha fallito»

La presidente del Consiglio Giorgia Meloni è andata a Caivano, vicino a Napoli, dopo il caso delle violenze di gruppo su due ragazzine di 10 e 12 anni. A invitarla era stato il parroco, don Maurizio Patriciello. «Qui lo Stato ha fallito, lavoriamo per una bonifica radicale in breve tempo – ha detto dopo averlo incontrato –. Siamo qui per metterci la faccia e per manifestare solidarietà a vittime innocenti». Meloni era stata minacciata prima della visita, ma non ci sono state vere proteste al suo arrivo: qualcuno l’ha acclamata, altri l’hanno applaudita e non è mancato qualche fischio di contestazione. Minacce sono state denunciate anche dalla madre di una ragazza vittima degli abusi.

O Mancini neuvo allenatô de l’Arabia Saudita pe 25 mioin à l’anno

E indiscreçioin son stæte confermæ: o Roberto Mancini, à doe settemañe da-e dimiscioin da-a naçionale italiaña formalizzæ a-i 13 d’agosto, o l’à firmou pe quella de l’Arabia Saudita. O l’anià à guägnâ 25 mioin à l’anno, sensa contâ i atri benefiçi. «Ò comensou à parlâ con loiatri a-a meitæ d’agosto e di mæ ascistenti no ô saivan – o l’à dito pe mette à taxei e critiche –. Chì gh’é un progetto strategico pe fâ cresce o ballon co-i zoeni. Gh’é tanto da louâ ma penso che porriemo fâghela». O primmo obiettivo o saià conquistâ a coppa d’Asia.

Traduçion italiaña

Mancini nuovo allenatore dell’Arabia Saudita per 25 milioni all’anno

Le indiscrezioni sono state confermate: Roberto Mancini, a due settimane delle dimissioni dalla nazionale italiana formalizzate il 13 agosto, ha firmato per quella dell’Arabia Saudita. Andrà a guadagnare 25 milioni all’anno, senza contare gli altri benefit. «Ho iniziato a parlare con loro a metà agosto e alcuni miei assistenti non lo sapevano – ha detto per mettere a tacere le critiche –. Qui c’è un progetto strategico per far crescere il calcio coi giovani. C’è tanto da lavorare ma penso che potremo farcela». Il primo obiettivo sarà conquistare la coppa d’Asia.

E notiçie da-o mondo

Senti a verscion registrâ:

Guæra in Ucraina, o Zelensky o l’arve a-a negoçiaçion in sciâ Crimea

O prescidente de l’Ucraina Volodymyr Zelensky o l’arve à unna soluçion «politica, ciufito che militare» in sciâ Crimea, region occupâ da-i rusci che i avversäi çercan de repiggiâ co-a controffensciva. Intanto à Zaporizhzhia, atro territöio occupou, l’é comensou e eleçioin pe l’assemblea regionale e i conseggi de 16 çittæ. «No anæ à votâ», l’appello arrivou da Kiev. In Ruscia l’analixi do Dna o l’à confermou a mòrte do Prigozhin, o cappo da Wagner preçipitou con un airoplano ch’o l’anava à Mosca. O morteuio o l’é stæto çelebrou in privou. O Cremlin o l’à parlou de un poscibile «crimine programmou». O Putin e o Kim Jong-un, cappo da Corea do Nòrd, an fæto un accòrdio pe fornî de arme à Mosca. O Zelensky, pe contra, o domanda a-a coaliçion ch’a ô sostëgne atri çento caccia F-16.

Traduçion italiaña

Guerra in Ucraina, Zelensky apre al negoziato sulla Crimea

Il presidente dell’Ucraina Volodymyr Zelensky apre a una soluzione «politica, piuttosto che militare» sulla Crimea, regione occupata dai russi che gli avversari cercano di riconquistare con la controffensiva. Intanto a Zaporizhzhia, altro territorio occupato, sono iniziate le elezioni per l’assemblea regionale e i consigli di 16 città. «Non andate a votare», l’appello arrivato da Kiev. In Russia l’analisi del Dna ha confermato la morte di Prigozhin, il capo della Wagner precipitato con un aereo diretto a Mosca. Il funerale è stato celebrato in privato. Il Cremlino ha parlato di un possibile «crimine programmato». Putin e Kim Jong-un, leader della Corea del Nord, hanno stretto un accordo per fornire armi a Mosca. Zelensky, dal canto suo, chiede alla coalizione che lo sostiene altri cento caccia F-16.

Tenscioin in Ciña, o Xi Jinping o veu schivâse o G20

O prescidente cineise Xi Jinping o porrieiva mancâ a-a riunion do G20 in India: incangio de lê porrieiva parteçipâ o primmo ministro Li Qiang. O ministëio de l’Estranxeo o no commenta, ma se pensa che a deçixon a segge conseggiâ da-e tenscioin politiche interne, sorviatutto quelle econòmiche. Defæti l’agençia internaçionale Fitch a l’à taggiou e stimme in sciô Pil cineise do 2023 da-o 5,6% a-o 4,8%. Ma à zugâ un ròllo saieiva ascì e relaçioin diffiçile con l’India pe-e bæghe in sciô confin de l’Himalaya, i ligammi co-a Ruscia (à propòxito, manco o Putin o saià presente) e a costion de Taiwan.

Traduçion italiaña

Tensioni in Cina, Xi Jinping vuole disertare il G20

Il presidente cinese Xi Jinping potrebbe mancare al vertice del G20 in India: al suo posto potrebbe partecipare il primo ministro Li Qiang. Il ministero degli Esteri non commenta, ma si pensa che la decisione sia dettata dalle tensioni politiche interne, soprattutto quelle economiche. Infatti l’agenzia internazionale Fitch ha tagliato le stime sul Pil cinese del 2023 dal 5,6% al 4,8%. Ma a giocare un ruolo sarebbero anche le relazioni difficili con l’India per le dispute sul confine dell’Himalaya, i legami con la Russia (a proposito, nemmeno Putin sarà presente) e la questione Taiwan.

Neuva York a dixe basta a-e pixoin pe-i turisti

À Neuva York unna lezze in varsciua da-i 5 de settembre a proibisce de dâ à pixon di sciti pe di periodi sotta i 30 giorni, sarvo che i òspiti staggan delongo in cà e che se fassan dâ unn’autorizzaçion. A-a reixe do provedimento gh’é a congestion do mercou inmobiliare inte unna çittæ donde l’é sempre ciù difiçile trovâ unna cà à un prexo ch’o se peu sostegnî. A mesua a veu corpî chi appixoña a-i turisti: pe questo Airbnb, l’applicaçion ciù addeuviâ pe prenotâ de scistemaçioin pe-e vacanse, a l’à fæto recorso, ma o giudiçe o l’à cacciou inderê.

Traduçion italiaña

New York dice basta agli affitti per i turisti

A New York una legge in vigore dal 5 settembre vieta di affittare appartamenti per periodi inferiori a 30 giorni, a meno che gli ospiti non stiano sempre in casa e che si facciano dare un’autorizzazione. All’origine del provvedimento c’è la congestione del mercato immobiliare in una città dove è sempre più difficile trovare una casa a un prezzo sostenibile. La misura vuole colpire chi affitta ai turisti: per questo Airbnb, l’applicazione più usata per prenotare sistemazioni per le vacanze, ha fatto ricorso, ma il giudice lo ha respinto.