O Zinâ

Ediçion

E notiçie da-a Liguria

Senti a verscion registrâ:

L’assascinio do Mohamed, ammassou e fæto à tòcchi perché o voeiva cangiâ de travaggio

Ammassou perché o voeiva louâ pe-a concorrensa e guägnâ de ciù pe lê e a seu famiggia. O l’é mòrto coscì o Mahmoud Sayed Mohamed Abdalla, o zoeno egiçian de 19 anni attrovou in mâ sensa moen e sensa testa a-i 25 de luggio passæ. I doî affermæ da-i carabinê son o Abdelwahab Ahmed Gamal Kamel, ciammou Tito, un di bacchen de l’Aly’s Barber Shop, a buttega da barbê donde a vittima a l’aiva travaggiou à Sestri Ponente, e o Mohamed Ali Abdelghani Ali, ciammou Bob, fræ de l’atro baccan. Domenega a-a mattin o Abdalla o ne vegniva da Pegi perché lì o l’aiva comensou à louâ pe-o sallon de un atro egiçian. Quello mæximo giorno i seu assascin, che voeivan fâghela pagâ e no poeivan açettâ ch’o ghe portesse via de casañe, avieivan accattou un cotello da coxiña e unna mannæa. Dapeu l’incontro inte un scito de stradda Voæ, donde stava à dormî tutti i louanti da buttega, e a rattella finia into sangue: trei corpi, a-o cheu, a-o steumago e a-o figæto. O cadaveo o l’é stæto misso inte unna valixe e portou in sce un tascì fin à Ciavai. In sciâ mæña, co-o scuo, gh’an taggiou di tòcchi, fòscia pe rende ciù diffiçile l’identificaçion, e l’an cacciou in mâ. O Bob e o Tito arrestan in prexon, a buttega a l’é stæta sexia. A testa do Mohamed a no se treuva ancon.

Traduçion italiaña

L’assassinio di Mohamed, ucciso e fatto a pezzi perché voleva cambiare lavoro

Ucciso perché voleva lavorare per la concorrenza e guadagnare di più per lui e la sua famiglia. È morto così Mahmoud Sayed Mohamed Abdalla, il giovane egiziano 19enne trovato in mare senza mani e senza testa lo scorso 25 luglio. I due fermati dai carabinieri sono Abdelwahab Ahmed Gamal Kamel, detto Tito, uno dei titolari di Aly’s Barber Shop, la barberia dove la vittima aveva lavorato a Sestri Ponente, e Mohamed Ali Abdelghani Ali, detto Bob, fratello dell’altro titolare. Domenica mattina Abdalla arrivava da Pegli perché lì aveva iniziato a lavorare per il salone di un altro egiziano. Quello stesso giorno i suoi assassini, che volevano fargliela pagare e non potevano accettare che gli sottraesse clientela, avevano comprato un coltello da cucina e una mannaia. Poi l’incontro in un appartamento di via Vado, dove dormivano tutti i dipendenti del negozio, e la lite finita nel sangue: tre colpi, al cuore, allo stomaco e al fegato. Il cadavere è stato messo in una valigia e portato su un taxi fino a Chiavari. Sulla spiaggia, col buio, lo hanno mutilato, forse per rendere più difficile l’identificazione, e lo hanno buttato in mare. Bob e Tito restano in carcere, l’attività è stata sequestrata. La testa di Mohamed non si trova ancora.

O Luca Delfino inta Rems, à Pra se vive inta poia

O l’é arrivou inta Rems Villa Caterina de d’ato à Pra o Luca Delfino, sciortio d’in prexon dòppo a condanna à 16 anni e mezo pe l’assascinio de l’Antonella Multari. Inta struttua pe-i autoî de crimini con de moutie de mente o ghe dovià passâ sëi anni e mezo. Inti primmi giorni, comm’o l’à dito o direttô da Rems o Paolo Rossi, o staià da solo inta seu stançia sensa parteçipâ à nisciuña attivitæ. Ma inta delegaçion ponentiña l’é montou a protesta di rescidenti che vivan inta poia pe-e continue evaxoin e domandan de mette a Rems da unn’atra parte. Segondo o direttô no gh’é reisego ch’o scappe: tutte e mesue de seguessa – o l’à garantio – son stæte rinforsæ ciù che se poeiva e l’attençion a l’é mascima.

Traduçion italiaña

Luca Delfino nella Rems, a Pra’ si vive nella paura

È arrivato nella Rems Villa Caterina sulle alture di Pra’ Luca Delfino, uscito di prigione dopo la condanna a 16 anni per l’omicidio di Antonella Multari. Nella struttura per gli autori di reato con malattie di mente dovrà passare sei anni e mezzo. Nei primi giorni, come ha detto il direttore della Rems Paolo Rossi, starà da solo nella sua stanza senza partecipare a nessuna attività. Ma nella delegazione ponentina è montata la protesta dei residenti che vivono nella paura per le continue evasioni e chiedono di trasferire la Rems. Secondo il direttore non c’è pericolo di fuga: tutte le misure di sicurezza – ha garantito – sono state rinforzate il più possibile e l’attenzione è massima.

Sandöia, o Lanna o l’arresta prescidente e o Ferrero o perde o recorso

A-i 3 d’agosto l’assemblea di açionisti da Sandöia a l’à renovou o conseggio d’amministraçion: o prescidente o l’arresta o Marco Lanna, l’unico confermou da vegia gestion. Feua o Bosco, che però o saià delongo direttô operativo. Comme esprescion da neuva propietæ intra l’imprenditô Matteo Manfredi e o commerçialista Raffaele Fiorella. Intanto o giudiçe Paolo Gibelli do tribunâ de Zena o l’à cacciou inderê o recorso presentou da-a soçietæ do Ferrero contra l’acquixiçion do club. E into campionato che vëgne no ghe saià a segonda penalizzaçion pe-e paghe versæ dòppo o dovuo, ma solo i doî ponti pe-i retardi in scî pagamenti de l’Irpef e e contribuçioin de l’Inps.

Traduçion italiaña

Sampdoria, Lanna resta presidente e Ferrero perde il ricorso

Il 3 agosto l’assemblea degli azionisti della Sampdoria ha rinnovato il Consiglio d’amministrazione: il presidente rimane Marco Lanna, l’unico confermato della vecchia gestione. Fuori Bosco, che però sarà sempre direttore operativo. Come espressione della nuova proprietà entrano l’imprenditore Matteo Manfredi e il commercialista Raffaele Fiorella. Intanto il giudice Paolo Gibelli del tribunale di Genova ha rigettato il ricorso presentato dalla società di Ferrero contro l’acquisizione del club. E nel prossimo campionato non ci sarà la seconda penalizzazione per gli stipendi versati dopo il dovuto, ma solo i due punti per i ritardi sui pagamenti Irpef e i contributi Inps

E notiçie da l’Italia

Senti a verscion registrâ:

Comensa i taggi a-o reddito de çittadinansa, tenscioin e proteste

Tenscion in sciô reddito de çittadinansa, da agosto in avanti sospeiso à miggiæa de persoñe con un messaggin mandou da l’Inps. Co-e neuve regole do Governo o sostëgno o va solo à chi gh’à a-o manco 60 anni ò ascì un minô ò un disabile à carrego. In sciâ fin à perdilo saià mezo mion d’italien. Tante proteste, sorviatutto into Mezogiorno, e assati a-i scagni di servixi soçiali di Commun da parte de famigge taggiæ feua da-a mesua. Into Palermitan un òmmo de 60 anni arrestou sensa reddito o l’à menassou de dâ feugo a-o scagno do scindico. «Che o Governo o vëgne à dâne conto ciù fito che se peu», a l’à dito a segrettäia do Pd Elly Schlein. Pe-o Giuseppe Conte, prescidente do Movimento 5 Stelle, o l’é «un desastro annonçiou». «Fasso do mæ megio», a respòsta da prescidente do Conseggio Giorgia Meloni inte unn’intervista a-a Fox. Comme çertificou da l’Inps, o reddito de çittadinansa o l’é costou 31 miliardi da-o prinçipio. E gazibbe son costæ mezo miliardo a-o fisco, segondo i dæti da Guardia de finansa.

Traduçion italiaña

Iniziano i tagli al reddito di cittadinanza, tensioni e proteste

Tensioni sul reddito di cittadinanza, da agosto in poi sospeso a migliaia di persone con un sms inviato dall’Inps. Con le nuove regole del Governo il sostegno va solo a chi ha almeno 60 anni oppure un minore o un disabile a carico. Alla fine a perderlo sarà mezzo milione di italiani. Molte proteste, soprattutto nel Mezzogiorno, e assalti agli uffici dei servizi sociali dei Comuni da parte delle famiglie escluse dalla misura. Nel Parlermitano un uomo di 60 anni rimasto senza reddito ha minacciato di dare fuoco all’ufficio del sindaco. «Il Governo venga a riferire il prima possibile», ha detto la segretaria del Pd Elly Schlein. Per Giuseppe Conte, presidente del Movimento 5 Stelle, è un «disastro annunciato». «Faccio del mio meglio», la risposta della presidente del Consiglio Giorgia Meloni in un’intervista a Fox. Come certificato dall’Inps, il reddito di cittadinanza è costato 31 miliardi e mezzo dall’inizio. Le truffe sono costate mezzo miliardo al fisco, secondo i dati della Guardia di finanza.

Dossieraggio abuxivo inte l’Antimafia, indaga a Procua de Peruggia

A Procua de Peruggia a l’à averto unn’investigaçion pe unn’attivitæ de dossieraggio abuxivo inta Direçion naçionale antimafia a-i danni de politichi e atri personaggi in vista. Tutto o l’é partio da unna denonçia do ministro da Defeisa Guido Crosetto ch’o l’à parlou de un «tentativo de condiçionâ a compoxiçion do neuvo governo con l’acquixiçion inleçita e a diffuxon strumentale de notiçie fäse pe attaccâme, un fæto graviscimo». Into mezo ghe saieiva un maresciallo da Guardia de finansa ch’o l’avieiva descarregou di papê reservæ sensa autorizzaçion, papê ch’aivan da fâ co-e segnalaçioin d’operaçioin bancäie sospette e che inte çerti caxi son finii in scî giornali primma che inte Procue. Un caxo ch’o sciata a politica, o Matteo Renzi o parla za de Killeròpoli.

Traduçion italiaña

Dossieraggio abusivo nell’Antimafia, indaga la Procura di Perugia

La Procura di Perugia ha aperto un’inchiesta per un’attività di dossieraggio abusivo nella Direzione nazionale antimafia ai danni di politici e altri personaggi esposti. Tutto è partito da una denuncia del ministro della Difesa Guido Crosetto che ha parlato di un «tentativo di condizionare la composizione del nuovo governo con l’acquisizione illecita e la diffusione strumentale di notizie false per attaccarmi, un fatto gravissimo». Al centro ci sarebbe un maresciallo della Guardia di finanza che avrebbe scaricato documenti riservati senza autorizzazione, documenti che riguardavano le segnalazioni di operazioni bancarie sospette e che in alcuni casi sono finiti sui giornali prima che nelle Procure. Un caso che scuote la politica, Matteo Renzi parla già di Killeropoli.

Arriva l’asseguaçion obrigatöia pe-i monopattini elettrichi

Pe-i monopattini elettrichi ghe vorrià l’asseguaçion pe anâ in scê stradde, comme pe-i atri veicoli à motô. Gh’é scrito into schema de decreto legislativo, approvou da-o Conseggio di ministri, ch’o reçepisce unna direttiva europea con l’òbrigo de covertua pe-i veicoli elettrichi legi. Ghe saià de deroghe pe-i mezi retiæ d’in gio e se porrià sospende l’asseguaçion de seu voentæ. Unn’atra novitæ in ponto traspòrti a l’é o tascì de badda a-a sciortia de discoteche pe tornâ à cà, coscì da avansâ che i zoeni imbriæghi se mettan a-a guidda. Se parla de un progetto sperimentale che pe-o momento o l’à da fâ con sëi locali inte tutta l’Italia fin a-a meitæ de settembre.

Traduçion italiaña

Arriva l’assicurazione obbligatoria per i monopattini elettrici

Per i monopattini elettrici sarà necessaria l’assicurazione per circolare in strada, come per gli altri veicoli a motore. È scritto nello schema di decreto legislativo, approvato dal Consiglio dei ministri, che recepisce una direttiva europea con l’obbligo di copertura per i veicoli elettrici leggeri. Ci saranno deroghe per i mezzi ritirati dalla circolazione e si potrà sospendere l’assicurazione di propria volontà. Un’altra novità in tema di trasporti è il taxi gratis all’uscita delle discoteche per tornare a casa, in modo da evitare che i giovani ubriachi si mettano alla guida. Si tratta di un progetto sperimentale che al momento riguarda sei locali in tutta Italia fino a metà settembre

E notiçie da-o mondo

Senti a verscion registrâ:

Stati Unii, o Trump incriminou pe l’assato à Capitol Hill o se deciara «no corpeive»

O passou prescidente di Stati Unii Donald Trump o l’é stæto incriminou pe l’assato à Capitol Hill di 6 de zenâ do 2021. Segondo o procuou speçiale Jack Smith e seu böxie avievan incoraggio l’attacco pe inversâ l’exito de eleçioin. O Trump, dòppo unn’udiensa duâ ciù pöco che mez’oa, o s’é deciarou pe-a tersa vòtta «no corpeive» e o l’à azzonto: «Contra de mi gh’é unna persecuçion portâ avanti da un avversäio politico». O reisego o l’é ch’o pòsse finî torna in tribunâ into mezo da campagna elettorale. Segondo i urtimi sondaggi i ciù tanti repubrichen stan ancon da-a seu parte: pe 69% a vittöia do Biden a no l’é stæta legittima.

Traduçion italiaña

Stati Uniti, Trump incriminato per l’assalto a Capitol Hill, si dichiara «non colpevole»

L’ex presidente degli Stati Uniti Donald Trump è stato incriminato per l’assalto a Capitol Hill del 6 gennaio 2021. Secondo il procuratore speciale Jack Smith le sue bugie avrebbero incoraggiato l’attacco per sovvertire l’esito delle elezioni. Trump, dopo un’udienza durata meno di mezz’ora, si è dichiarato per la terza volta «non colpevole» e ha aggiunto: «Contro di me è in atto una persecuzione portata avanti da un avversario politico». Il rischio è che possa finire nuovamente in tribunale nel mezzo della campagna elettorale. Secondo gli ultimi sondaggi la maggior parte dei repubblicani stanno ancora dalla sua parte: per il 69% la vittoria di Biden non è stata legittima.

Guæra in Ucraina, attacchi con di droin contra e nave rusce in Crimea

Attacco de l’Ucraina con di droin contra e nave rusce into pòrto de Novorossijsk, in Crimea, à l’arba di 4 d’agosto. Kiev a l’afferma d’avei guastou unna nave militare, Mosca a sostëgne d’avei sghindou l’attacco e cacciou zu i droin. Inti giorni passæ i rusci, segondo l’Ucraina, avieivan destruto 40mia tonëi de gran in sciô Danubio. In allerta a Romania: «No poemo açettâ i attacchi vexin a-o confin». O Cremlin o l’aiva deciarou ascì d’avei abbattuo sette droin ucraini vexin à Mosca.

Traduçion italiaña

Guerra in Ucraina, attacchi con droni contro le navi russe in Crimea

Attacco dell’Ucraina con droni contro le navi russe nel porto di Novorossijsk, in Crimea, all’alba del 4 agosto. Kiev afferma di aver messo fuori uso una nave militare, Mosca sostiene di avere sventato l’attacco e abbattuto i droni. Nei giorni scorsi i russi, secondo l’Ucraina, avrebbero distrutto 40mila tonnellate di grano sul Danubio. In allerta la Romania: «No possiamo accettare gli attacchi vicino al confine». Il Cremlino aveva dichiarato inoltre di avere abbattuto sette droni ucraini vicino a Mosca.

O pappa Françesco à Lisboña con 500mia zoeni da tutto o mondo

O pappa Françesco o l’é xoou à Lisboña pe-a Giornâ mondiale da Zoentù donde 500mia persoñe arrivæ da 150 Paixi l’an festezzou à l’arrivo con di canti e di balli. O pontefiçe o l’à fæto di neuvi appelli pe-a paxe e o l’à ciammou torna l’impegno de l’Euröpa. Inte l’occaxon o Bergoglio o l’à incontrou ascì de vittime de violense sessuale commisse da-o clero portogheise. A-i vescoi e a-i prævi o l’aiva mostrou a «deluxon» e a «raggia» che «çerti an contra a Gexa, de vòtte pe-a nòstra gramma testimoniansa e pe-i scandali che gh’an bruttou a cea». A-i 6 d’agosto a messa a-o Parque Tejo pe serrâ a manifestaçion.

Traduçion italiaña

Papa Francesco a Lisbona con 500mila giovani da tutto il mondo

Papa Francesco è volato a Lisbona per la Giornata mondiale della Gioventù dove 500mila persone arrivate da 150 Paesi lo hanno festeggiato all’arrivo con canti e balli. Il pontefice ha lanciato nuovi appelli per la pace e ha invocato di nuovo l’impegno dell’Europa. Nell’occasione Bergoglio ha incontrato anche alcune vittime di violenze sessuale commesse dal clero portoghese. Ai vescovi e ai preti aveva sottolineato la «delusione» e la «rabbia» che «alcuni hanno contro la Chiesa, talvolta per la nostra cattiva testimonianza e per gli scandali che ne hanno deturpato il volto». Il 6 agosto la messa al Parque Tejo per chiudere la manifestazione.