O Zinâ

Ediçion

E notiçie da-a Liguria

Senti a verscion registrâ:

Inçendio à l’uspiâ San Martin, 63 paçienti stramuæ. Investigaçion da Procua

Un inçendio o l’é scciuppou inta nottoaña tra i 18 e i 19 de luggio à l’uspiâ San Martin de Zena. O feugo o l’é partio d’inta stançia di gruppi de continuitæ elettrica a-o terso cian do Monoblòcco da-a parte de levante e o fumme o l’à invaso i reparti de terapie intenscive e de rianimaçioin a-o segondo, a-o quarto e a-o chinto cian ascì. Inte l’insemme s’é dovuo stramuâ 63 paçienti. Nisciun l’é arrestou ferio ò atteuscegou. I pompê son intervegnui pe asmortâ o feugo e pe mette a-o seguo i pacchi de batterie. Inte l’erco de un giorno i ciù tanti reparti son stæti missi torna in deuvia, levou quello toccou da-o feugo ch’o l’à beseugno de unna bonifica ciù longa. A Procua a l’à averto unn’investigaçion pe inçendio corposo e a l’à sexio i gruppi de continuitæ. O direttô generale do policlinico, o Marco Damonte Prioli, o l’à fæto savei che i appægi ean in regola co-e manutençioin programmæ: «O l’é stæto un açidente imposcibile da prevedde», o l’à dito.

Traduçion italiaña

Incendio all’ospedale San Martino, 63 pazienti trasferiti. Inchiesta della Procura

Un incendio è scoppiato nella nottata tra il 18 e il 19 luglio all’ospedale San Martino di Genova. Le fiamme sono partite dalla sala dei gruppi di continuità elettrica al terzo piano del Monoblocco lato levante e il fumo ha invaso i reparti di terapie intensive e di rianimazione anche al secondo, quarto e quinto piano. Complessivamente è stato necessario trasferire 63 pazienti. Nessuno è rimasto ferito o intossicato. I vigili del fuoco sono intervenuti per spegnere il fuoco e mettere in sicurezza i pacchi batterie. Nell’arco di un giorno la maggior parte dei reparti sono stati ripristinati, eccetto quello lambito dal fuoco che ha bisogno di una bonifica più lunga. La Procura ha aperto un’inchiesta per incendio colposo e ha sequestrato i gruppi di continuità. Il direttore generale del policlinico, Marco Damonte Prioli, ha fatto sapere che le apparecchiature erano in regola con le manutenzioni programmate: «È stato un incidente impossibile da prevedere», ha detto.

Papê fäsci in scî contròlli a-e autostradde, domandou o giudiçio pe 47 indagæ

A Procua de Zena a l’à domandou de mandâ à giudiçio 47 persoñe indagæ inte l’investigaçion à propòxito di papê fäsci in scê autostradde in Liguria, unna veña giudiçiäia, nasciua apreuvo a-o desastro do ponte Morandi, ch’a s’ea averta ascì da-o deruo da galleria Bertê de l’A26. Pe 12 de lô a Procua a l’à propòsto o pattezzo. I accaxonamenti, à titolo differente, son de fäso, sfrouxo, attentato a-a seguessa di traspòrti, deruo corposo. Tra i indagæ gh’é o passou amministratô delegou de l’Aspi o Giovanni Castellucci. Segondo a Guardia de finansa i tecnichi da Spea ammermavan i rappòrti in scê condiçioin di ponti pe avansâ de fâ i loei. S’ea descoverto ascì che i schermi anti-sciato de çerti træti d’autostradda ean ammagagnæ e s’ean destaccæ mettendo à reisego i autisti. Anche pe-e gallerie i contròlli no se favan à cadello, segondo a Procua. Inti pròscimi giorni saià fissou l’udiensa preliminare.

Traduçion italiaña

Falsi report sui controlli alle autostrade, chiesto il giudizio per 47 indagati

La Procura di Genova ha chiesto il rinvio a giudizio per 47 persone indagate nell’inchiesta relativa ai falsi report sulle autostrade in Liguria, un filone giudiziario, nato dopo il disastro di ponte Morandi, che era scaturito anche dal crollo della galleria Berté dell’A26. Per 12 di loro la Procura ha proposto il patteggiamento. Le accuse, a vario titolo, sono di falso, frode, attentato alla sicurezza dei trasporti, crollo colposo. Tra gli indagati c’è l’ex amministratore delegato di Aspi Giovanni Castellucci. Secondo la Guardia di finanza i tecnici di Spea ammorbidivano i report sulle condizioni dei ponti per evitare di fare i lavori. Era stato scoperto anche che le barriere antirumore di alcuni tratti autostradali erano difettose e si erano staccate mettendo in pericolo gli autisti. Anche per le gallerie i controlli non si facevano a regola d’arte, secondo la Procura. Nei prossimi giorni sarà fissata l’udienza preliminare.

Figgeu de doî anni addentou da un can, grave a-o Gaslini

Un figgeu de doî anni o l’é stæto addentou inta faccia da un can de rassa pitbull e o l’é anæto in condiçioin grave à l’uspiâ Gaslini de Zena. O l’é capitou a-i 18 de luggio à Vallecreusa, in sciâ Rivea de Ponente. Da quello che s’é accapio, o figgeu o stava in cà con seu moæ e a bestia quande o padron o l’é introu da-a pòrta: o piccin o se gh’é asbriou adòsso e o can o l’à attaccou. I meghi do Gaslini l’an sottopòsto à un intervento de quattro oe pe mettighe torna insemme o naso e a ganascia e pe sarvâghe l’euggio ch’o l’é stæto ascì dannezzou da-o mòrscio. E seu condiçioin van delongo megio. O padron, o galante da moæ do figgeu, o l’é indagou pe lexon personale corposa e i carabinê son apreuvo à investigâ in sce comme l’ea tegnuo o can. In Liguria a l’é stæta a segonda aggrescion inte pöchi giorni: unna dònna de 34 anni, torna à Vallecreusa, a l’ea stæta addentâ da-o seu pitbull a-o brasso e a-o peto.

Traduçion italiaña

Bambino di due anni azzannato da un cane, grave al Gaslini

Un bambino di due anni è stato azzannato al volto da un cane di razza pitbull ed è finito in gravi condizioni all’ospedale Gaslini di Genova. È successo il 18 luglio a Vallecrosia, nella Riviera di Ponente. Da quanto è emerso, il bimbo si trovava in casa con sua madre e l’animale quando il padrone è entrato dalla porta: il piccolo gli è corso incontro e il cane lo ha attaccato. I medici del Gaslini l’hanno sottoposto a un intervento di quattro ore per ricomporgli il naso e la mandibola e per salvargli l’occhio che pure è stato danneggiato dal morso. Le sue condizioni sono in miglioramento. Il padrone, il compagno della madre del bambino, è indagato per lesione personale colposa e i carabinieri stanno indagando su come era tenuto il cane. In Liguria è stata la seconda aggressione in pochi giorni: una donna di 34 anni, ancora a Vallecrosia, era stata morsa dal suo pitbull al braccio e al torace

E notiçie da l’Italia

Senti a verscion registrâ:

O Patrick Zaki o l’é libero, in agosto o maiezzo in Egitto

O Patrick Zaki, l’attivista egiçian passou dottô à l’universcitæ de Bològna e fæto prexonê do 2020, o l’é libero areo. Dòppo a condanna à trei anni into proçesso à seu carrego à Mansura, o prescidente al-Sisi o gh’à dæto a graçia. Sabbo l’arrivo in Italia, ma o no gh’arrestià guæi perché in agosto o tornià in Egitto pe maiâse co-a seu sposâ a Reny Iskander. «Nisciun bato co-a costion do Regeni – o l’à dito o ministro de l’Estranxeo Tajani –. Aniemo avanti à ciammâ luxe piña in sce quello caxo. Co-a nòstra politica emmo dæto un sostëgno determinante». A prescidente do Conseggio Giorgia Meloni a s’é recillâ: «Ghe prego de cheu unna vitta de paxe e de fortuñe».

Traduçion italiaña

Patrick Zaki è libero, in agosto il matrimonio in Egitto

Patrick Zaki, l’attivista egiziano laureatosi all’università di Bologna e incarcerato nel 2020, è completamente libero. Dopo la condanna a tre anni nel processo a suo carico a Mansura, il presidente al-Sisi gli ha concesso la grazia. Sabato l’arrivo in Italia, ma non ci rimarrà molto perché in agosto tornerà in Egitto per sposarsi con la sua fidanzata Reny Iskander. «Nessun baratto con la vicenda Regeni – ha detto il ministro degli Esteri Tajani –. Continueremo a chiedere luce piena su quel caso. Con la nostra politica abbiamo dato un contributo decisivo». La presidente del Consiglio Giorgia Meloni si è rallegrata: «Gli auguro di cuore una vita di serenità e successi».

Mòrto o giornalista Andrea Purgatori, a Procua a l’indaga in scê cue à l’uspiâ

L’Italia a cianze o Andrea Purgatori, giornalista d’investigaçion mòrto a-a cheita à Romma a l’etæ de 70 anni pe unna grave forma de cancao. Pe di anni o l’aiva travaggiou in sce di caxi comme a strage d’Ustica, i assascinni de mafia e de terroriximo naçionale e internaçionale, quello do Aldo Moro, i anni de ciongio e a spariçion da Emanuela Orlandi. In sciâ seu mòrte a Procua de Romma a l’à averto unn’investigaçion pe assascinio corposo apreuvo a-a denonçia da famiggia pe de presonte cue erræ à l’uspiâ. Doe persoñe son stæte inscrite into registro di indagæ. Inte sti giorni se faià l’autopscia, intanto i carabinê an acquixio e cartelle cliniche.

Traduçion italiaña

Morto il giornalista Andrea Purgatori, la Procura indaga sulle cure ospedaliere

L’Italia piange Andrea Purgatori, giornalista d’inchiesta morto improvvisamente a Roma all’età di 70 anni per una grave forma di cancro. Per anni aveva lavorato su casi come la strage di Ustica, gli omicidi di mafia e di terrorismo nazionale e internazionale, quello di Aldo Moro, gli anni di piombo e la sparizione di Emanuela Orlandi. Sulla sua morte la Procura di Roma ha aperto un’inchiesta per omicidio colposo in seguito alla denuncia della famiglia per presunte cure sbagliate in ospedale. Due persone sono state iscritte nel registro degli indagati. In questi giorni si farà l’autopsia, intanto i carabinieri hanno acquisito le cartelle cliniche.

Tempeste e gragneua into Settentrion, dapeu unn’atra settemaña de cado african

Tempeste e gragneua into Settentrion dòppo l’ondâ de cado african ch’a l’à fæto patî tutta l’Italia con de temperatue de 35 graddi e passa (a-a dreitua 47 graddi inte çerti pòsti) e l’erta umiditæ ch’a rende l’ascidio ancon pezo. In Lombardia rammæ d’ægua, gragneua e unna tromba d’äia ch’a l’à misso unna gran poia, ma sensa fâ di gròsci guasti. A fin de settemaña a pòrta ancon do tempo grammo e un pö de fresco, ma i esperti avvertan che l’antiçiclon o remontià fin a-a fin de luggio in sce tutto o Paise. E o 2022, l’anno ciù cado inta stöia italiaña, o porrievia za perde a primma poxiçion. Anche l’Onu a l’à misso in guardia: «E ondæ de cado saian sempre ciù fòrte».

Traduçion italiaña

Temporali e grandine al Nord, poi un’altra settimana di caldo africano

Temporali e grandine al Nord dopo l’ondata di caldo africano che ha fatto patire tutta l’Italia con temperature di oltre 35 gradi (addirittura 47 gradi in alcune località) e l’alta umidità che rende ancora peggiore il disagio. In Lombardia nubifragi, grandine e una tromba d’aria che ha creato grande spavento ma senza fare grossi danni. Il weekend porta ancora maltempo e un po’ di fresco, ma gli esperti avvertono che l’anticiclone rimonterà fino alla fine di luglio su tutto il Paese. E il 2022, l’anno più caldo nella storia italiana, potrebbe già perdere il primato. Anche l’Onu ha messo in guardia: «Le ondate di caldo saranno sempre più intense».

E notiçie da-o mondo

Senti a verscion registrâ:

Guæra in Ucraina, sätou l’accòrdio in sciô gran

O prescidente ruscio Vladimir Putin o l’à misso fin à l’accòrdio in sciô gran ucraino ottegnuo che l’é un anno co-a mediaçion da Turchia. Allarme into mondo pe-e conseguense umanitäie co-e nave carreghe ch’arrestan ferme. L’Union Europea, a Nato e i Stati Unii an condannou a deçixon: «Mioin de persoñe ne paghian o prexo». Kiev a l’à denonçiou di bombardamenti rusci ch’avievian destruto 60mia tonëi de gran. O Vatican o l’à mandou o cardinâ Zuppi à Washington. Intanto, in sciô fronte interno, a magistratua a l’à domandou vint’anni de prexon pe l’oppoxitô Aleksej Naval’nyj che, primma d’intrâ in tribunale, o l’à definio a guæra in Ucraina «a ciù scemma e sensa senso de sto secolo». A sentensa a s’aspeta pe-i 4 d’agosto.

Traduçion italiaña

Guerra in Ucraina, saltato l’accordo sul grano

Il presidente russo Vladimir Putin ha messo fine all’accordio sul grano ucraino ottenuto un anno fa con la mediazione della Turchia. Allarme nel mondo per le conseguenze umanitarie col blocco delle navi cariche. L’Unione Europea, la Nato e gli Stati Uniti hanno condannato la decisione: «Milioni di persone ne pagheranno il prezzo». Kiev ha denunciato bombardamenti russi che avrebbero distrutto 60mila tonnellate di grano. Il Vaticano ha inviato il cardinale Zuppi a Washington. Intanto, sul fronte interno, la magistratura ha chiesto vent’anni di reclusione per l’oppositore Aleksej Naval’nyj che, prima di entrare in tribunale, ha definito la guerra in Ucraina «la più stupida e insensata di questo secolo». La sentenza è attesa per il 4 agosto.

Eleçioin in Gran Bretagna, desfæta pe-i conservatoî «ma megio che o previsto»

Desfæta politica pe-i conservatoî a-o governo in Gran Bretagna, donde gh’é stæto e eleçioin de supplemento inte trei collegi. A carrega lasciâ veua da-o Boris Johnson, passou primmo ministro ch’o l’à dæto e dimiscioin, a l’é stæta mantegnua, ma i atri doî an visto inversâse e maggioranse a-i danni do partio do primmo ministro Rishi Shunak. Ma segondo i commenti a l’é anæta fiña ben, visto che e previxoin do giorno avanti davan tutti i collegi a-i laburisti. À Selby l’oppoxiçion a l’à repiggiou 20mia voti e passa in sciô 2019 e à Sommerton l’à guägno a candidâ di liberaldemocratichi, tersa fòrsa do Regno.

Traduçion italiaña

Elezioni in Gran Bretagna, sconfitta per i conservatori «ma meglio del previsto»

Disfatta politica per i conservatori al governo in Gran Bretagna, dove si sono tenute le elezioni suppletive in tre collegi. Il seggio lasciato libero da Boris Johnson, ex premier dimissionario, è stato mantenuto, ma gli altri due hanno visto ribaltarsi le maggioranze ai danni del partito del primo ministro Rishi Shunak. Ma secondo i commenti è andata meglio delle aspettative, visto che le previsioni della vigilia davano tutti i collegi ai laburisti. A Selby l’opposizione ha recuperato oltre 20mila voti sul 2019 e a Sommerton ha vinto la candidata dei liberaldemocratici, terza forza del Regno.

Mòrto o Tony Bennet, l’urtimo crooner american

O l’é mòrto à 96 anni o Tony Bennet, lezendäio cantante american, tegnuo pe l’urtimo gran crooner. Inta seu longa carrea o l’à guägno 20 Grammy Awards e o l’à travaggiou insemme à Lady Gaga, Aretha Franklin e Frank Sinatra. Da sette anni o pativa da moutia d’Alzheimer, comm’aiva deciarou seu moggê Susan. Con tutto, o l’ea anæto avanti à exibîse e registrâ fin a-a giornâ d’ancheu.

Traduçion italiaña

Morto Tony Bennet, l’ultimo crooner americano

È morto a 96 anni Tony Bennet, leggendario cantante americano, considerato l’ultimo grande crooner. Nella sua lunga carriera ha vinto 20 Grammy Awards e ha lavorato insieme a Lady Gaga, Aretha Franklin e Frank Sinatra. Da sette anni soffriva di morbo di Alzheimer, come aveva dichiarato sua moglie Susan. Nonostante questo, aveva continuato a esibirsi e registrare fino agli ultimi tempi.