O Zinâ

Ediçion

E notiçie da-a Liguria

Senti a verscion registrâ:

À Zena comensa i travaggi pe-o tunnel sotta o pòrto

Dòppo trent’anni de discuscion l’é comensou i travaggi pe-a construçion do tunnel sotta o pòrto de Zena. A-i 28 de zugno l’é partio o “lòtto zero”, loei de preparaçion pe-o scavo che saian gestii direttamente da Autostrade sensa bandi. I costi do travaggio son astimmæ in scî 900 mioin d’euro, tutti finançiæ da Aspi into campo de l’accòrdio da 1,4 miliardi dòppo o cròllo do ponte Morandi. A speisa in de ciù, à peto do preventivo, a saià spantegâ in scî pedaggi de tutta a ræ, coscì o tunnel o l’arrestià de badda. O percorso o saià longo in scî 3,5 chillòmetri da San Benigno fin a-a Foxe. O saià formou da doe gallerie prinçipæ con un diametro de feua de 16 metri. De drento se porrià anâ spedii à 70 km/h. A mascima profonditæ a saià de 41 metri sotta o livello do mâ e o passià 30 metri sotta Caignan. Intanto se comensià à discutte in sciô destin da Sorvelevâ, se cacciâla zu (tutta ò unna parte) ò se mantegnîla con de fonçioin differente.

Traduçion italiaña

A Genova iniziano i lavori per il tunnel subportuale

Dopo trent’anni di dibattiti sono iniziati i lavori per la costruzione del tunnel sotto il porto di Genova. Il 28 giugno è partito il ‘lotto zero’, lavori propedeutici allo scavo che saranno gestiti direttamente da Autostrade senza gare. I costi dell’opera sono stimati in circa 900 milioni di euro, tutti finanziati da Aspi nell’ambito dell’accordo da 1,4 miliardi dopo il crollo del ponte Morandi. La spesa in eccesso, rispetto al preventivo, sarà spalmata sui pedaggi di tutta la rete, così il tunnel rimarrà gratuito. Il percorso sarà lungo circa 3,5 chilometri da San Benigno fino alla Foce. Sarà costituito da due gallerie principali con un diametro esterno di 16 metri. All’interno si potrà tenere una velocità di 70 km/h. La massima profondità sarà di 41 metri sotto il livello del mare e passerà 30 metri sotto Carignano. Intanto si inizierà a discutere sul destino della Sopraelevata, se demolirla (tutta o in parte) o se mantenerla con funzioni diverse.

The Ocean Race, l’arrivo da regatta. Da Zena o Papê pe-i driti di Oçeani

A-o neuvo Waterfront de Levante l’é arrivou e barche da regatta The Ocean Race, a competiçion à veia in gio a-o mondo. A-i 29 de zugno i americhen do 11th Hours Racing Team an taggiou o traguardo e an guägno co-i 4 ponti d’aggiustamento in ciù reconosciui dòppo o scontro con Guyot a-a partensa da l’Äia. À bòrdo anche a Francesca Clapcich, primma italiaña inta stöia à guägnâ a regatta. A-i 26 de zugno i polacchi de Wind Whisper son arrivæ pe-i primmi inta classe VO65, terso pòsto pe-o team Zena. Intanto à l’Ocean Live Park gh’é stæto l’urtimo incontro in sciô Papê pe-i driti di Oçeani ch’o saià presentou a-i 18 de settembre à l’assemblea de Naçioin Unie, con l’intençion de fâlo approvâ pe-o 2030. O scindico Marco Bucci o l’à firmou unna lettia de sostëgno con l’impegno à proteze o mâ, comme tutti i amministratoî de çittæ toccæ da-a regatta.

Traduçion italiaña

The Ocean Race, l’arrivo della regata. Da Genova la Carta per i diritti degli Oceani

Al nuovo Waterfront di Levante sono arrivate le barche della regata The Ocean Race, la competizione a vela intorno al mondo. Il 29 giugno gli americani del 11th Hours Racing Team hanno tagliato il traguardo e hanno vinto coi 4 punti di riparazione in più riconosciuti dopo la collisione con Guyot alla partenza dall’Aia. A bordo anche Francesca Clapcich, prima italiana nella storia a vincere la regata. Il 26 giugno i polacchi di Wind Whisper sono arrivati primi nella classe VO65, terzo posto per il team Genova. Intanto all’Ocean Live Park c’è stato l’ultimo incontro sulla Carta per i diritti degli Oceani che sarà presentata il 18 settembre all’assemblea delle Nazioni Unite, con l’obiettivo di farla approvare entro il 2030. Il sindaco Marco Bucci ha firmato una lettera di sostegno con l’impegno a proteggere il mare, come tutti gli amministratori delle città toccate dalla regata.

Sandöia, o Andrea Pirlo o l’é o neuvo allenatô

O Andrea Pirlo, campion do mondo co-a naçionale italiaña do 2006, o l’à firmou co-a Sandöia: o saià lê o neuvo allenatô da squaddra inta saxon ch’a vëgne. L’accòrdio o l’é arrivou dòppo a renonçia de un atro “azzurro” di tempi d’öo, o Fabio Grosso. «Allenâ a Sandöia l’é comme allenâ in Serie A, pe mi a l’é unna grande opportunitæ – o l’à dito a-a presentaçion offiçiale –. Sta soçietæ a l’é un scimbolo de l’Italia, mi son cresciuo co-e lezendie do Vialli e do Mancini». Pròpio co-o Döia o Pirlo o l’aiva debuttou in sciâ banca da Juventus. Un atro protagonista de l’impreisa italiaña do 2006, o Alberto Gilardino, o l’é stæto confermou a-a guidda do Zena.

Traduçion italiaña

Sampdoria, Andrea Pirlo è il nuovo allenatore

Andrea Pirlo, campione del mondo con la nazionale italiana nel 2006, ha firmato con la Sampdoria: sarà lui il nuovo allenatore della squadra nella prossima stagione. L’accordo è arrivato dopo la rinuncia di un altro “azzurro” dei tempi d’oro, Fabio Grosso. «Allenare la Sampdoria è come allenare in Serie A, per me è una grande opportunità – ha detto alla presentazione ufficiale –. Questa società è un simbolo dell’Italia, io sono cresciuto coi miti di Vialli e Mancini». Proprio con la Samp Pirlo aveva debuttato sulla panchina della Juventus. Un altro protagonista dell’impresa italiana del 2006, Alberto Gilardino, è stato confermato alla guida del Genoa.

E notiçie da l’Italia

Senti a verscion registrâ:

Assascinio à Romma, ammassâ à cotellæ unna figgia de 17 anni

Unna figgia de 17 anni, Maria Michelle Caruso, a l’é stæta ammassâ à cotellæ à Romma. O seu còrpo o l’é stæto attrovou a-i 28 de zugno inte un sacco da rumenta misso inte un carrello da speisa into quartê de Primavalle. Pe l’assascinio l’é stæto fermou un zoenòtto de 17 anni, originäio do Sri Lanka ma nasciuo à Romma, interrogou pe de oe in questua. Pâ che no fïsan ligæ da unna relaçion, ma fòscia a figgia a l’aiva refuou. Segondo a reconstruçion, o zoeno o l’avieiva çercou de desfâse do cadaveo ma o l’é stæto visto da un passante che, a-a vista do sangue ch’o ne sciortiva, o l’à ciammou o 112. «Ne l’an ammassâ comme un can, sensa unna raxon. Tutti ghe voeivan ben», e poule de seu poæ.

Traduçion italiaña

Omicidio a Roma, uccisa a coltellate una ragazza di 17 anni

Una ragazza di 17 anni, Maria Michelle Caruso, è stata uccisa a coltellate a Roma. Il suo corpo è stato trovato il 28 giugno in un sacco dell’immondizia messo in un carrello della spesa nel quartiere di Primavalle. Per l’omicidio è stato fermato un ragazzo di 17 anni, originario dello Sri Lanka ma nato a Roma, interrogato per ore in questura. Sembra che non fossero legati da una relazione, ma forse la ragazza lo aveva rifiutato. Secondo la ricostruzione, il giovane avrebbe cercato di disfarsi del cadavere ma è stato visto da un passante che, alla vista del sangue che ne usciva, ha chiamato il 112. «Ce l’hanno ammazzata come un cane, senza un motivo. Tutti la amavano», le parole del padre.

Caxo Santanchè, o governo o l’appreuva un papê “contra” a ministra

O governo o l’à dæto un pai poxitivo – à sorpreisa – à un ordine do giorno do Pd ch’o l’impegna à «sançionâ chi avesse sfrütou de sfrouxo a cascia integraçion Covid» e a minsoña pròpio a Visibilia Editore, a soçietæ controllâ alantô da-a Daniela Santanchè into mezo de investigaçioin averte da-a Procua de Milan. «An fæto ben, son d’accòrdio», a l’à respòsto a ministra do Turiximo. L’oppoxiçion a l’insciste pe-e seu dimiscioin. A prescidente do Conseggio Giorgia Meloni a l’à dito che o scì do governo à quello papê «o no va interpretou politicamente» e che «a ministra a vegnià a-a Camia e a faià ciæo». O caxo o nasce da un serviçio da trasmiscion Report in sce Rai3. A Santanchè a l’é indagâ pe bancarotta e fäso in redncionto pe-i anni 2016-2020.

Traduçion italiaña

Caso Santanchè, il governo approva un documento ‘contro’ la ministra

Il governo ha dato parere favorevole – a sorpresa – a un ordine del giorno del Pd che impegna a «sanzionare chi avesse sfruttato in maniera fraudolenta la cassa integrazione Covid» e cita proprio la Visibilia Editore, la società controllata all’epoca da Daniela Santanchè al centro delle indagini aperte dalla Procura di Milano. «Hanno fatto bene, sono d’accordio», ha replicato la ministra del Turismo. L’opposizione insiste per le sue dimissioni. La presidente del Consiglio Giorgia Meloni ha detto che il sì del governo a quel documento «non va interpretato politicamente» e che «la ministra verrà alla Camera e chiarirà». Il caso nasce da un servizio della trasmissione Report su Rai3. Santanchè è indagata per bancarotta e falso in bilancio per gli anni 2016-2020.

Ninte prexon à vitta pe l’anarchico Alfredo Cospito

A Corte d’appello de Turin a l’à dæto 23 anni de prexon à l’anarchico Alfredo Cospito, ben conosciuo pe-a seu battaggia contra o 41 bis con un longhiscimo sciòpero da famme ch’o l’aiva misso à reisego de moî. A Procua, into proçesso “Scripta Manent” pe-e attivitæ de l’organizzaçion terroristica Fai-Fri, a l’aiva domandou a prexon à vitta. A condanna a l’é pe l’attentato di 2 de zugno do 2006 a-a scheua di carabinê de Fossan, clascificou da-a Cassaçion comme “strage politica”. I giudiçi an applicou l’attenuante do “fæto legio” perché «no gh’é stæto di mòrti e i danni ascì son stæti minimi», comme aivan dito i seu avvocati. «No gh’é ninte ch’o mostre che semmo stæti noiatri à mette e bombe – o l’à sostegnuo o Cospito –. A periçia in sciô papê de revendicaçion a l’é inattendibile. Inte 20 anni d’attentati no gh’é mai stæto manco un mòrto: ean solo di atti dimostrativi pe reciammâ l’attençion».

Traduçion italiaña

Niente ergastolo per l’anarchico Alfredo Cospito

La Corte d’appello di Torino ha dato 23 anni di reclusione all’anarchico Alfredo Cospito, particolarmente noto per la sua battaglia contro il 41 bis con un lunghissimo sciopero della fame che lo ha messo in pericolo di vita. La Procura, nel processo ‘Scripta Manent’ per le attività dell’organizzazione terroristica Fai-Fri, aveva chiesto il carcere a vita. La condanna è per l’attentato del 2 giugno 2006 alla scuola dei carabinieri di Fossano, classificato dalla Cassazione come ‘strage politica’. I giudici hanno applicato l’attenuante del ‘fatto lieve’ perché «non ci sono stati morti e anche i danni sono stati minimi», come avevano detto i suoi avvocati. «Niente mostra che siamo stati noi a mettere gli ordigni – ha sostenuto Cospito –. La perizia sul documento di rivendicazione è inattendibile. In 20 anni di attentati non c’è mai stato nemmeno un morto: erano solo atti dimostrativi per richiamare l’attenzione».

E notiçie da-o mondo

Senti a verscion registrâ:

Ruscia, dòppo l’insurreçion fallia o Putin o çerca de repiggiâ o contròllo

Dòppo o tentativo d’insurreçion do Yevgeny Prigozhin, cappo do gruppo Wagner, o prescidente ruscio Vladimir Putin o çerca d’affermâ torna a seu autoritæ. Segondo a Reuters, o porrieiva avei taggiou feua o Valery Gerasimov, cappo de l’exerçito, e o Sergei Surovikin, cappo de fòrse de l’aviaçion e segondo in commando de l’invaxon de l’Ucraina, che pe-o momento o no se treuva, con de fonte differente che ô dan pe arrestou. De seguo a Wagner a no combattià ciù in Ucraina. «I ammutinæ no son arriëscii à scciappâ a Ruscia», o l’à dito o Putin. E o l’à ringraçiou i sordatti pe avei «schivou unna guæra çivile». O Prigozhin o saieiva ancon inte un abergo sensa barcoin à Minsk. Intanto l’é comensou à Bruxelles o Conseggio Europeo: tra i argomenti prinçipæ a scituaçion in Ruscia, o sostëgno de l’Ue à Kiev e o rinfòrso da cooperaçion co-a Nato, ch’a l’é representâ da-o segretäio generale Stoltenberg.

Traduçion italiaña

Russia, dopo l’insurrezione fallita Putin cerca di riprendere il controllo

Dopo il tentativo d’insurrezione di Yevgeny Prigozhin, capo del gruppo Wagner, il presidente russo Vladimir Putin cerca di riaffermare la propria autorità. Secondo la Reuters, potrebbe aver escluso Valery Gerasimov, capo dell’esercito, e Sergei Surovikin, capo delle forze dell’aviazione e secondo in comando dell’invasione in Ucraina, che al momento è introvabile, con diverse fonti che lo danno per arrestato. Di sicuro la Wagner non combatterà più in Ucraina. «Gli ammutinati non sono riusciti a spaccare la Russia», ha detto Putin. E ha ringraziato i militari per aver «evitato una guerra civile». Prigozhin sarebbe ancora in un albergo senza finestre a Minsk. Intanto è iniziato a Bruxelles il Consiglio Europeo: tra gli argomenti principali la situazione in Russia, il sostegno dell’Ue a Kiev e il rafforzamento della cooperazione con la Nato, che è rappresentata dal segretario generale Stoltenberg.

Zoeno ammassou da-a poliçia, scontri e sacchezzi in Fransa

Invexendo in Fransa dòppo che un poliçiòtto o l’à ammassou un zoeno de 17 anni ch’o no s’ea fermou à un pòsto de blòcco à Nanterre. Di scontri e di sacchezzi son avvegnui inte neutte passæ inte banlieu de Pariggi e atre çittæ, con 400 e passa persoñe arrestæ. Di zoeni an dæto feugo a-e staçioin de poliçia. Miggiæa de poliçiòtti e xandarmi son stæti mobilitæ pe prevegnî de neuve violense. «Unna mòrte ch’a no se peu giustificâ», o l’à dito o prescidente Macron ch’o l’à convocou l’unitæ de crixi ma o no l’à deciarou o stato d’emergensa. A Procua a l’à domandou l’arresto pe-o poliçiòtto ch’o l’à tiou co-a pistòlla azzonzendo che «no gh’ea e condiçioin legale pe addeuviâ l’arma». Lê o l’à dito d’ëse devastou e o domanda perdon a-a famiggia.

Traduçion italiaña

Giovane ucciso dalla polizia, scontri e saccheggi in Francia

Caos in Francia dopo che un poliziotto ha ucciso un giovane di 17 anni che non si era fermato a un posto di blocco a Nanterre. Scontri e saccheggi sono avvenuti nelle notti scorse nelle banlieu di Parigi e altre città, con oltre 400 persone arrestate. Alcuni giovani hanno dato fuoco alle stazioni di polizia. Migliaia di poliziotti e gendarmi sono stati mobilitati per prevenire nuove violenze. «Una morte ingiustificabile», ha detto il presidente Macron che ha convocato l’unità di crisi ma non ha dichiarato lo stato d’emergenza. La Procura ha chiesto l’arresto per il poliziotto che ha sparato con la pistola aggiungendo che «non c’erano le condizioni legali per usare l’arma». Lui ha detto di essere devastato e chiede perdono alla famiglia.

Inflaçion, a Bce a l’annonçia unna neuva montâ di tasci d’interesse

A prescidente da Banca Çentrale Europea Lagarde a l’à annonçiou unna neuva montâ di tasci d’interesse do 2023 pe contegnî l’inflaçion. Unna politica ch’a no ghe gusta a-o governo italian: i ministri Tajani, Salvini e Urso an ciammou o reisego da reçescion: «Coscì no s’aggiutta a crescita e se fa di guasti a-e famigge». «O nòstro travaggio o no l’é finio», a l’à dito a Lagarde à Sintra, in Portogallo, antiçipando unna neuva streita à luggio. Pe-o prescidente da Fed Jerome Powell, «saià ben tiâ sciù i tasci doe vòtte ò ciù avanti da fin de l’anno. E prescioin son sempre erte e o proçesso pe tegnî l’inflaçion a-o 2% o l’à ancon tanta stradda da fâ».

Traduçion italiaña

Inflazione, la Bce annuncia un nuovo rialzo dei tassi d’interesse

La presidente della Banca Centrale Europea Lagarde ha annunciato un nuovo rialzo dei tassi d’interesse nel 2023 per contenere l’inflazione. Una politica che non piace al governo italiano: i ministri Tajani, Salvini e Urso hanno invocato il rischio della recessione: «Così non si aiuta la crescita e si danneggiano le famiglie». «Il nostro lavoro non è finito», ha detto Lagarde a Sintra, in Portogallo, anticipando una nuova stretta a luglio. Per il presidente della Fed Jerome Powell, «sarà opportuno alzare i tassi due o più volte entro la fine dell’anno. Le pressioni sono sempre alte e il processo per tenere l’inflazione al 2% ha ancora molta strada da fare».